عوامی مقامات پر غیرمناسب لباس ممنوعہ قرار،5ہزار ریال جرمانہ ہوگا

April 22, 2019

سعودی عرب میں عوامی مقامات پر لوگوں کے غیر مناسب لباس پہننے کو ممنوعہ قرار دیتے ہوئے خلاف ورزی پر 5 ہزار ریال جرمانہ عائد کرنے کا فیصلہ کیا گیا ہے۔

سعودی کابینہ کی جانب سے اخلاق عامہ کے حوالے سے گزشتہ ہفتے منظور ہونے والی قرار داد پر عمل درآمد کا آغاز کرتے ہوئے متعلقہ اداروں کو ہدایات کر دی گئی ہیں جس کے مطابق عوامی مقامات پر غیر مناسب لباس جس پر غیر اخلاقی عبارت یا تصویر بنی ہو سختی سے منع ہے۔

سعودی انتظامیہ کے مطابق خلاف ورزی کرنے والے اخلاق عامہ قانون کے دائر میں آئیں گے اور ان پر 5 ہزار ریال تک جرمانہ عائد کیا جائے گا۔ سعودی کابینہ کی جانب سے منظور ہونے والی قرار داد کے حوالے سے سعودی میڈیا نے بتایا کہ سعودی تہذیب تقافت کو مد نظر رکھتے ہوئے عوامی مقامات بغیر اجازت وال چاکنگ کرنا یا دیواروں پر تصاویر وغیر ہ بنانا ممنوع ہے۔ایسا کرنے والے بھی قانون شکنی کے زمرے میں آئیں گے۔

اس ضمن میں سعودی وزارت داخلہ کی جانب سے قومی کمیٹی برائے سیاحت و قومی ورثہ کے علاوہ قانون نافذ کرنے والے اداروں کو بھی مطلع کر دیا گیا ہے کہ وہ قانون پر عمل درآمد کو یقینی بنائیں اور خلاف ورزی کرنے والوں پر کڑی نظر رکھی جائے۔

وزارت داخلہ کی جانب سے جاری بیان میں کہا گیا ہے کہ ایسے افراد جن پر ایک برس کے دوران وہی خلاف ورزی دوبارہ درج کی جائے ان پرجرمانے کی رقم بھی ڈبل کردی جائے گی۔