جاپان نے دنیا کی تیز ترین بلٹ ٹرین بنا لی

May 13, 2019

جاپان میں دنیا کی تیز ترین بلٹ ٹرین متعارف کرادی گئی ہے۔ ریل حکام کا کہنا ہے کہ جاپان دو ہزار تیس تک اس نئی ٹرین کو عام افراد کے لئے چلانے کا ارادہ رکھتا ہے‌‌‌۔

خبر رساں ایجنسی کے مطابق دنیا کی تیز ترین بلٹ ٹرین الفا ایکس دو سو چوبیس میل فی گھنٹہ کی رفتار سے دوڑ سکتی ہے۔ اس نئی ٹرین کا ٹیسٹ رن گزشتہ روز شروع ہوگیا۔

 

دس بوگیوں پر مشتمل الفا ایکس ٹرین نئی ٹیکنالوجی سے لیس ہے اور اس میں ایک بڑی ایروڈائنامک نوز دی گئی ہے، جو ٹرین کے دباﺅ اور آواز کو سرنگوں میں سے گزرتے ہوئے کم کردیتی ہے۔

 

اس ٹرین کے دیگر فیچر میں ایسے خاص آلات کی موجودگی ہے جو زلزلے کے جھٹکے کے اثرات کو کم کردیتے ہیں۔ یہ نئی ٹرین چین میں دوڑنے والی تیز ترین بلٹ ٹرین کو پیچھے چھوڑ دے گی، جس کی رفتار دو سو سترہ میل فی گھنٹہ ہے، اس نئی ٹرین کا ٹیسٹ رن مارچ دو ہزار بائیس تک جاری رہے گا۔

ٹرین کے آپریٹرز کا ارادہ ہے کہ اس نئی بلٹ ٹرین کو لگ بھگ دو سو اننچاس میل فی گھنٹہ کی رفتار سے بھی دوڑا کر دیکھا جائے، حالانکہ کمرشل آپریشن کے لیے اس کی حد رفتار دو سو چوبیس میل فی گھنٹہ ہے۔