ہوم   > Latest

ایک روزہ کرکٹ سے ریٹائرمنٹ پر شعیب ملک کا پیغام

3 months ago

قومی کرکٹ ٹیم کے سابق کپتان شعیب ملک نے سوشل میڈیا پر بھی ایک روزہ انٹرنیشنل کرکٹ سے ریٹائرمنٹ کا اعلان کردیا۔

پاکستان کے لیے 287 ایک روزہ میچ کھیلنے والے شعیب ملک نے ٹوئٹر اور انسٹا گرام پر اپنی ریٹائرمنٹ سے متعلق بتاتے ہوئے سب کا شکریہ ادا کیا۔

شعیب نے اپنی ٹویٹ میں لکھا ’’ آج میں ایک روزہ بین القوامی کرکٹ سے ریٹائرہوگیا ہوں، ان تمام پلیئرز کا جن کے ساتھ میں نے کرکٹ کھیلی، کوچز جنہوں نے مجھے ٹریننگ دی، فیملی، دوست میڈیا اور اسپانسرز اور سب سے بڑھ کر میرے پرستاروں کا بے حد شکریہ۔ مجھے آپ سب سے پیار ہے ‘‘۔

یاد رہے کہ شعیب ملک نے گزشتہ سال ورلڈ کپ 2019 کے بعد ایک روزہ بین القوامی کرکٹ سے ریٹائرمنٹ لینے کا اعلان کیا تھا جو انہوں نے کل پاکستان کرکٹ ٹیم کے آخری میچ کے بعد پورا کردیا۔

امکان ظاہر کیا جا رہا تھا کہ گزشتہ روز لارڈز میں بنگلادیش کے خلاف کھیلے جانے والے میچ میں شعیب ملک کو شامل کیا جائے گا لیکن ایسا نہ ہوا اور وہ اپنا الوداعی میچ نہ کھیل سکے۔

میچ کے اختتام پر کھلاڑیوں نےشعیب ملک کی خدمات کو سراہا اور انہیں تالیاں بجاتے ہوئے میدان سے رخصت کیا۔

ورلڈ کپ میں شعیب ملک کی کارکردگی انتہائی مایوس کن رہی، ٹیم کے سب سے تجربہ کار کھلاڑی ہونے کے باوجود شعیب ملک تین اہم ترین میچز میں صرف 8 رنز بناسکے۔ انگلینڈ کیخلاف انہوں نے 8 رنز بنائے جبکہ آسٹریلیا اور بھارت کے خلاف بغیر کوئی رن بنائے ہی پویلین لوٹ گئے جس کے بعد دیگر میچز میں انہیں شامل نہیں کیا گیا۔

عالمی کپ سے پہلے انگلینڈ کیخلاف ہونے والی سیریز میں بھی شعیب ملک کی اوسط بیٹنگ 14 رنز فی اننگز تھی جبکہ اس سے قبل وہ نیوزی لینڈ، جنوبی افریقا اور آسٹریلیا کیخلاف ہونے والی ون ڈے سیریز میں بھی ناکام رہے تھے۔

 

آپ کے تبصرے

Your email address will not be published.

 
متعلقہ خبریں
 
 
 
 
 
 
 
 
مقبول خبریں