عالمی فاتح ٹیم کے کھلاڑی مباپے کا آمدنی عطیہ کرنیکا اعلان

Ambreen Sikander
July 18, 2018

فٹ بال کے عالمی شہنشاہ فرانس کے کھلاڑی مباپے نے اپنی عالمی کپ کی آمدنی عطیہ کرنے کا اعلان کیا ہے۔

عالمی کپ فٹ بال 2018 کا تاج اپنے سرپہ سجانے والی ٹیم فرانس کے اسٹار کھلاڑی کائلین مباپے نے اپنی تمام تر ورلڈ کپ کی آمدنی فلاحی ادارے کوعطیہ کرنے کا فیصلہ کرلیا ہے۔

ورلڈ کپ میں بہترین نوجوان کھلاڑی کا اعزاز پانے والے مباپے کی آمدنی کھیل کے لیے کام کرنے والے فلاحی ادارے ’پریمئرز ڈی کورڈی‘ کو جائے گی جو معذور اور بیمار بچوں کے لیے کام کرتا ہے۔ اسپورٹس السٹریٹڈ کے مطابق نوجوان کھلاڑی کو عالمی کپ میں 265000پائونڈز کی آمدنی ہوئی جو بونس کے بعد 384000پائونڈز بنتی ہے جبکہ انہیں عالمی کپ میں ایک میچ کے 17000پائونڈز ملتے تھے۔

یہاں یہ بات بھی قابل ذکر ہے کہ 19سالہ نوجوان مباپے کی مدد سے فرانس نے عالمی کپ کے فائنل میں حریف کروشیا کے خلاف 2-4 سے کامیابی سمیٹی، مباپے نے کروشیا کے خلاف عالمی کپ کا آخری گول اسکور کیا اور ٹیم کو فتح دلانے میں اہم کردار ادا کیا۔

عالمی کپ میں مباپے کی کارکردگی اچھی رہی جہاں انہوں نے 4 گول اسکور کیے اورایونٹ میں وہ ایک ابھرتے ہوئے کھلاڑی کے طور پر سامنے آئے جبکہ 1958میں برازیلین پیلے کے بعد وہ پہلے کھلاڑی ہیں جس نے عالمی کپ کے فائنل میں گول کیا۔

مباپے تیسرے کم عمر نوجوان ہیں جنہوں نے عالمی کپ کھیلنے کا اعزاز حاصل ہوا جبکہ اس سے پہلےبرازیلین پیلے اور اٹلی کے گوئسپی برگومی تھے۔ دوسری جانب فلاحی ادارے کے منیجر سبیسٹئن روفن کا کہنا ہے کہ کائلین ایک زبردست آدمی ہے ،جب اس کے پاس وقت ہوتا ہے وہ خوشی سے ہمارے پاس آکر اس وقت کو بچوں کے ساتھ گزارتا ہے جبکہ اس کی بچوں کے ساتھ بہت اچھی دوستی ہے اور وہ ہمیشہ اچھے الفاظوں سے ان کا حوصلہ بڑھاتا رہتا ہے۔ انہوں نے مزید بتایا کہ کبھی تو ہمیں ایسا لگتا ہے کہ وہ ان بچوں کے آپس میں کھیلنے سے زیادہ خود ان کے ساتھ کھیلنا زیادہ پسند کرتا ہے۔