Sunday, January 16, 2022  | 12 Jamadilakhir, 1443

پاکستانی ڈاکٹرز، معاشی اور آئی ٹی ماہرین افغانستان بھیجنے کافیصلہ

SAMAA | - Posted: Jan 14, 2022 | Last Updated: 2 days ago
SAMAA |
Posted: Jan 14, 2022 | Last Updated: 2 days ago

وزیر اعظم عمران خان کی زیر صدارت اپیکس کمیٹی کے اجلاس نے افغانستان میں بگڑتے انسانی بحران پر تشویش کا اظہار کرتے ہوئے پاکستان سے تربیت یافتہ افراد پڑوسی برادر ملک بھیجنے کا فیصلہ کیا۔ 

افغانستان کی صورتحال پر غور کے لیے جمعہ کومنعقد ہونے والے ایپکس کمیٹی کی اجلاس میں آرمی چیف جنرل قمر جاوید باجوہ، ڈی جی آئی ایس آئی، وزیر خارجہ شاہ محمود قریشی، وزیر اطلاعات فواد چوہدری، وزیر داخلہ شیخ رشید ، مشیر تجارت عبدالرزاق داؤد اور مشیر قومی سلامتی ڈاکٹر معید یوسف بھی شریک ہوئے۔

اس موقع پر وزیراعظم نے متعلقہ حکام کو انسانی بحران روکنے کے لیے میڈیکل، فنانس اور آئی ٹی سے تعلق رکھںے والے تربیت یافتہ افراد افغانستان بھیجنے اور دیگر دوست ممالک کے ساتھ مل کر مسائل کا حل تلاش کرنے کی ہدایت کی۔

عمران خان کا کہنا تھا کہ اقوام متحدہ کی جانب سے افغانستان کیلئے امداد کی اپیل کا خیرمقدم کرتےہیں۔ اعلامیہ میں کہا گیا ہے کہ عالمی برادری اور امدادی ادارے افغانستان کو امداد فراہم کریں۔

وزیراعظم نے افغانستان کی معاشی بحالی اور ترقی میں مدد کے لیے ریلوے، معدنیات، فارماسیوٹیکل اور میڈیا کے شعبوں میں تعاون بڑھانے کی بھی ہدایت کی۔

اعلامیہ کے مطابق وزراعظم کا کہنا تھا کہ پاکستان افغانستان کے انسانی بحران سے نمٹنے کے لیے افغان عوام کو ہر ممکن مدد فراہم کرنے کے لیے پرعزم ہے، افغانستان میں قیمتی جانوں کو بچایا جانا سب سے زیادہ ضروری ہے۔

اعلامیہ میں کہا گیا کہ پاکستان اس مشکل وقت میں افغانوں کو تنہا نہیں چھوڑے گا، امدادی ادارے افغانستان کو امداد فراہم کریں تاکہ افغانستان کو قیمتی جانوں کے نقصان اور معاشی بحران سے بچایا جا سکے۔

ایپکس کمیٹی کو انسانی امداد پر ہونے والی پیش رفت کے بارے میں بھی آگاہ کیا گیا جس میں غذائی اجناس، گندم، طبی سامان، موسم سرما میں پناہ گاہیں اور دیگر سامان شامل ہیں۔

اس سے قبل وزیراعظم عمران خان سے آرمی چیف کی ون آن ون ملاقات بھی ہوئی جس میں ملک کی مجموعی سیکیورٹی صورتحال پر بات چیت کی گئی۔

WhatsApp FaceBook
تازہ ترین
 
 
 
مقبول خبریں
مقبول خبریں
 
 
 
 
 
Facebook Twitter Youtube