لاہور : توہم پرست ماں نے اپنے ہی بچوں کے جسم جلادیئے، خاتون گرفتار

June 20, 2019

لاہور میں دور جاہلیت کی یاد تازہ ہوگئی، توہم پرست ماں مبینہ طور پر 2 کمسن بچوں کو باندھ کر جلاتی رہی، والد نے بچوں کو اسپتال داخل کرا دیا، خاتون سمیت 4 افراد کو گرفتار کرلیا گیا۔

توہم پرستی مبتلا ماں نے اپنے ہی بچوں کو رسی سے باندھ کر جلانے کی کوشش کی، افسوسناک واقعہ لاہور کے علاقہ قلعہ گجر سنگھ میں پیش آیا، جہاں مبینہ طور پر خاتون نے 3 سالہ بیٹی مریم اور 2 سالہ جارج کو جلا کر زخمی کردیا۔

بچوں کے والد سائمن سلیم کے مطابق اس کی بیوی انیتا جن نکالنے کیلئے بچوں پر عمل کرتی رہی، جو وہ بچوں کو لینے گیا تو انہیں بری حالت میں پایا۔

سائمن کی درخواست پر پولیس نے مقدمہ درج کرکے بچوں کی والدہ سمیت 4 افراد کو حراست میں لے لیا۔

گرفتار خاتون کا کہنا ہے کہ بچوں میں جن تھے، جن کو نکالنے کیلئے بچوں پر تشدد کیا۔

میو اسپتال کی ایمرجنسی میں زیرعلاج دونوں بچوں کی حالت بہتر بتائی جاتی ہے۔