وزیراعظم کے خطاب سے قبل شہلا رضا کی طنزیہ ٹویٹ

June 11, 2019

پیپلز پارٹی کی رہنما سیدہ شہلا رضا نے طنز کرتے ہوئے کہا ہے کہ وزیراعظم عمران خان قوم سے خطاب میں عوام کو بجٹ سے ’’گھبرانا نہیں ہے‘‘ کا کہیں گے۔

اپنی ٹویٹ میں شہلا رضا نے کچھ یوں طنز کیا کہ، ’’وزیراعظم قوم سے 9:15 پر خطاب کریں گے۔ پاکستانیوں، بجٹ آپ تک پہنچ گیا، اس میں 770 ارب کے ٹیکس ہیں، اس پر اپوزیشن کہے گی کہ مہنگائی بڑھے گی، مگر آپ نے گھبرانا نہیں ہے، یقین دلاتا ہوں کہ غریبوں پر اس کا اثر نہیں ہوگا، اب صرف دو سال کی بات ہے، دو بجٹ اور ایسے آگئے تو ملک میں ایک بھی غریب نہیں رہے گا۔

پی پی رہنما نے حکومت کی جانب سے بجٹ کو ’’عوام دشمن بجٹ‘‘ قرار دیا اور کہا کہ پی ٹی آئی کی سیاست گالی نامہ اور بجٹ ٹیکس نامہ ہے۔

پی ٹی آئی کا 7،036 ارب روپے حجم کا پہلا مکمل بجٹ پیش،اپوزیشن کا بھرپور احتجاج

وفاقی حکومت کی جانب سے بجٹ 20۔2019 پیش کیے جانے کے بعد وزیراعظم عمران خان نے قوم سے خطاب کا اعلان کیا۔ تحریک انصاف کی حکومت نے اپنا پہلا بجٹ پیش کیا ہے۔