سعودی عرب یکم جولائی سے ادھار تیل دے گا، مشیر خزانہ

May 23, 2019

پاکستانی معیشت کیلیے خوشخبری آگئی، سعودی عرب سے ادھار تیل کی ترسیل جولائی سے شروع ہوگی ۔

مشیر خزانہ عبدالحفیظ شیخ کہتے ہیں کہ سعودی عرب پاکستان کو سالانہ تین اعشاریہ دو ارب ڈالر مالیت کا تیل ادھار پر دے گا، اس اقدام سے پاکستان پر ادائیگیوں کا بوجھ کم ہوگا، تین برسوں کے دوران نو اعشاریہ چھ ارب ڈالر کا تیل اُدھار ملے گا۔

مشیر خزانہ کا اپنے بیان میں کہنا تھا کہ سعودی عرب تین سال تک پاکستان کو مؤخر ادائیگیوں پر تیل دے گا جس سے پاکستان کے ادائیگیوں کے توازن کی پوزیشن بہتر ہوگی، تیل کی فراہمی کا آغاز یکم جولائی سے ہوگا۔

دوسری جانب وزیرمملکت برائے ریونیو حماد اظہر کا کہنا ہے کہ اس سے پاکستان کا کرنٹ اکاؤنٹ خسارہ کم ہوگا، خسارے جس تیزی سے نیچے جارہے ہیں، بہت جلد معیشت بہتر ہوجائے گی۔