کالعدم جماعت الدعوۃ کے نائب امیر مولانا عبدالرحمان مکی گرفتار

May 15, 2019

قانون نافذ کرنے والے اداروں نے کالعدم جماعت الدعوۃ کے نائب امیر اور کالعدم تنظیم فلاح انسانیت کے رہنما مولانا عبدالرحمان مکی کو گرفتار کرلیا۔

پنجاب پولیس کے مطابق مولانا عبدالرحمان مکی کو گوجرانوالہ سے گرفتار کیا گیا ہے، جس کے بعد انہیں لاہور جیل منتقل کردیا گیا۔

 

حکام کا کہنا ہے کہ عبدالرحمان مکی کو اشتعال انگیز تقرریں کرنے اور نقص امن عامہ کے تحت گرفتار کیا گیا ہے۔ ذرائع کا یہ بھی کہنا ہے کہ مولانا مکی نے گزشتہ دنوں ملک بھر میں کالعدم تنظیموں کے خلاف جاری کریک ڈاون پر شدید تنقید کی تھی۔

 

مولانا مکی نے عوام سے اپنی تنظیم فلاح انسانیت کے نام پر چندے کی اپیل بھی کی تھی اور ایف اے ٹی ایف کے اقدامات کو کڑی تنقید کا نشانہ بنایا تھا۔

 

واضح رہے کہ عبدالرحمان مکی کالعدم جماعت الدعوۃ کے سربراہ حافظ سعید کے برادر نسبتی ہیں۔ عبدالرحمان مکی کالعدم جماعت الدعوۃ کے نائب امیر ،سیاسی اور خارجہ امور کے نگران بھی ہیں۔ مولانا حافظ سعید کی نظر بندی کے بعد جماعت کی  باگ دوڑ مولانا عبدالرحمان مکی نے سنبھالی تھی۔