منشیات اسمگلنگ کیس، گرفتار غیر ملکی ماڈل کو 8 سال قید کی سزا

March 20, 2019

منشیات اسمگلنگ کے الزام میں گرفتار غیر ملکی خاتون ماڈل تریزا السکووا کو عدالت نے 8 سال قید کی سزا سنا دی۔ایک ملزم شواہد نہ ملنے پر بری کردیا گیا۔ 

 منشیات اسمگلنگ کیس کا فیصلہ 14 ماہ بعد سنادیا گیا۔ عدالتی فیصلے کے مطابق تریزا پر ہیروئن کی اسمگلنگ کا جرم ثابت ہوگیا اور انھیں آٹھ سال اور آٹھ ماہ جیل میں گزارنا ہوں گے۔غیر ملکی ماڈل کو قید سمیت 1 لاکھ 13 ہزار روپے جرمانے کی سزا بھی سنائی گئی۔سیشن عدالت کا فیصلہ آیا تو تریزا الیسکووا کی مسکراہٹ  آنسووں میں بدل گئی۔

اسمگلنگ کے الزام میں گرفتار چیک ریپبلک کی خاتون جیل منتقل

چیک ریپبلک کی ماڈل 10 جنوری 2018 کو 9 کلو ہیروئین لے جانے کی کوشش میں گرفتار ہوئی تھیں۔ پچھلے سال دبئی سے آئرلینڈ جاتے ہوئے لاہور ایئرپورٹ پر سامان کی چیکنگ کے دوران ہیروئین برآمد ہوئی۔

تریزا نے دسمبر میں ہونے والی سماعت میں کرسمس سے پہلے ہی فیصلے سنائے جانے کی خواہش کی مگر اس دوران جج کا تبادلہ ہوگیا۔