سندھ سے لاپتہ 13 شہری گھر واپس آچکے، پولیس و رینجرز

September 12, 2018

پولیس اور رینجرز کے جانب سے سندھ ہائیکورٹ میں جمع کرائی گئی رپورٹ میں بتایا گیا ہے کہ سندھ سے لاپتہ ہونے والے تیرہ شہری گھر واپس آچکے ہیں۔


سندھ ہائیکورٹ میں لاپتہ افراد کی بازیابی سے متعلق کیس کی سماعت کے دوران پولیس اور رینجرز نے گھر واپس آنیوالے شہریوں سے متعلق رپورٹ جمع کرائی جس کے مطابق کئی ماہ سے لاپتہ 13 شہری گھر واپس آچکے ہیں۔

جسٹس نعمت اللہ نے ریمارکس دیئے کہ عدالت کی کوششوں سے شہری گھروں کو لوٹ رہے ہیں۔ عدالت عالیہ نے دیگر لاپتہ شہریوں کو بازیاب کرا کر 10 اکتوبر تک رپورٹ پیش کرنے کا حکم دیا۔

دوسری جانب 25 سے زائد لاپتہ افراد کی عدم بازیابی سے متعلق سماعت کے دوران جسٹس نعمت اللہ پھلپوٹو نے پولیس افسران سے مخاطب ہو کر ریمارکس دیئے کب تک آپ لاپتہ افراد کو بازیاب کرائیں گے؟، عدالت نے مؤثر اقدامات کرنے اور ایک ماہ میں نتائج سے آگاہ کرنے کا حکم دے دیا۔