آر ٹی ایس کی بندش، انتخابات کو متنازع بنایا جارہا ہے، اعظم سواتی

August 31, 2018

اعظم سواتی کہتے ہیں کہ انتخابات کو متنازع بنایا جارہا ہے، الیکشن کمیشن یا نادرا کی صفائی پیش نہیں کررہے، رات 2 بجے تک 51 فیصد نتائج آر ٹی ایس پر آچکے تھے، آر ٹی ایس سسٹم کو روکا گیا، اس کی تحقیقات کیلئے چیئرمین نادرا کو ہٹایا جائے۔ فواد چوہدری کہتے ہیں کہ انتخابات کی شفافیت پر یقین رکھتے ہیں۔

پاکستان تحریک انصاف کے رہنماء سینیٹر اعظم سواتی اور وزیر اطلاعات فواد چوہدری نے آر ٹی ایس سسٹم میں خرابی کے معاملے پر میڈیا کو بریفنگ دی۔

سینیٹر اعظم سواتی کہتے ہیں کہ آر ٹی ایس معاملے پر الیکشن کو متنازع بنایا جارہا ہے، آر ٹی ایس سسٹم کو روکا گیا، اس کی تحقیقات ہونی چاہئے، آر ٹی ایس سسٹم کی انکوائری کیلئے چیئرمین نادرا کو ہٹایا جائے، شہباز شریف کو آر ٹی ایس سسٹم بند ہونے کا کیسے پتا چلا؟۔

ان کا کہنا ہے کہ ثابت کروں گا 2018ء کا الیکشن شفاف تھا، آر ٹی ایس پر تھوڑی سی ریسرچ کرکے آیا ہوں، ایک لاکھ 70 ہزار میں سے صرف 91 شکایات درج ہوئیں، ہم الیکشن کمیشن اور نادرا کی صفائی نہیں پیش کررہے، رات 2 بجے تک 51 فیصد نتائج آر ٹی ایس پر آچکے تھے۔

فواد چوہدری کہتے ہیں کہ آر ٹی ایس سسٹم کے غیر فعال ہونے پر کافی اعتراضات سامنے آئے، وزیراعظم نے اپنی پہلی ہی تقریر میں اپوزیشن سے کہا تھا کہ دھاندلی کے جو بھی الزامات سامنے لائے گئے ان پر تحقیقات کیلئے کمیشن بنانے کو تیار ہیں، پاکستان میں سب سے اہم بات یہ ہے کہ انتخابی نتائج پر کوئی انگلی نہ اٹھاسکے۔

ان کا کہنا ہے کہ تحریک انصاف اور عمران خان نے انتخابی دھاندلی کیخلاف پوری لڑائی لڑی ہے، کرکٹ میں نیوٹرل امپائر لانے کا سہرا بھی عمران خان کے سر ہے، ہم شفافیت پر یقین رکھتے ہیں اور چاہتے ہیں کہ انتخابات مکمل طور پر شفاف ہونے چاہئیں۔

فواد چوہدری نے مزید کہا کہ سابق وزیراعظم نواز شریف کے فضائی سفر کے اخراجات اربوں روپے کے ہیں، حسن، حسین اور مریم نواز نے سرکاری خرچے پر سفر کئے، نواز شریف کے بچوں نے ایک کروڑ 70 لاکھ روپے سے زائد کے اخراجات کئے، وفاقی حکومت نے ڈھائی کروڑ کا بل نواز شریف کو بھیجنے کا فیصلہ کیا ہے۔