راول پنڈی میں ڈینگی کے مریضوں کی تعداد بڑھنے لگی

July 12, 2019

موسم بدلتے ہی راولپنڈی میں ڈینگی مچھروں نے پھر سے یلغار شروع کر دی ہے۔ شہر کے تینوں الائیڈ اسپتالوں میں ڈینگی کے مریض آنا شروع ہوگئے ہیں۔ ڈاکٹروں نے بھی ہنگامی حالات سے نمٹنے کی تیاری کرلی۔

بارشوں کا موسم آتے ہی راولپنڈی میں مچھروں کی تعداد بڑھ رہی ہے۔ ڈینگی مچھر سے شہری پریشان ہورہے ہیں۔ اب تک 300 سے زائد افراد نے ڈینگی وائرس کے شبے میں اسپتالوں کا رخ کیا۔

رواں سیزن میں ہولی فیملی اسپتال میں آنے والے 9 جبکہ بینظیر بھٹو اسپتال میں گزشتہ 48 گھنٹوں کے دوران 2 مریضوں میں ڈینگی کی تصدیق ہوگئی ہے۔ اسپتالوں نے ڈینگی سے نمٹنے کے لیے پیشگی انتظامات کرلیے ہیں۔

ہولی فیملی اسپتال کے ڈاکٹر طارق نیازی نے بتایا ہے کہ ڈینگی کے مریضوں کے لیے 70 بستر مختص کردئیے ہیں جن کو 125 تک بڑھا سکتے ہیں۔ انھوں نے مزید بتایا کہ ڈینگی وارڈ میں ڈاکٹروں کی مسلسل ٹریننگ کا عمل جاری ہے۔

ڈینگی وارڈ کے مریض کہتے ہیں کہ حکومت ڈینگی پر قابو پانے کے لیے موثر اقدامات کرے۔