جنسی ہراسانی :میشا شفیع نے دو قانونی ماہرین کی خدمات حاصل کرلیں

April 24, 2018

علی ظفر کی جانب سے 10 کروڑ روپے ہرجانے کے نوٹس کے جواب میں میشا شفیع نے بھی قانونی ماہرین کی خدمات حاصل کرلیں۔

سماجی رابطوں کی ویب سائٹ ٹوئٹر پر اپنے پیغام میں میشا شفیع نے لکھا کہ ’’ بیرسٹر پینسوٹا اور قانونی ماہر کے طور پرنگہت داد جنسی ہراسانی کے حوالے سے علی ظفر اور میرے معاملات کو دیکھیں گے۔ میڈیا سے درخواست ہے کہ کسی بھی اپ ڈیٹ کے حوالے سے ان دونوں سے رابطہ کریں۔

علی ظفر کی جانب سےمیشا شفیع کیلئے قانونی نوٹس میں کہا گیا ہے کہ ہراساں کرنے سے متعلق جھوٹے دعویٰ پر میشا شفیع 14روز میں میڈیا پر آکرمعافی مانگیں بصورت دیگر 10 کروڑ کا ہرجانہ ادا کیا جائے۔

 

واضح رہے کہ انیس اپریل کو گلوکارہ، اداکارہ اور ماڈل میشا شفیع نے ٹوئٹر پر اپنے پیغام میں لکھا کہ علی ظفر نے ایک سے زیادہ مواقع پر انہیں جنسی طور پر ہراساں کیا، ایسے واقعات کا سامنا انہوں نے اپنی نوجوانی کے دور کے علاوہ تب بھی کیا جب وہ دو بچوں کی ماں تھیں۔ میشا کے مطابق یہ سب شیئرکر کے انہوں نے مثال قائم کی ہے کیونکہ وقت آگیا ہے کہ خواتین کو اس حوالے سے بات کرنی چاہیئے۔

ردعمل میں علی ظفر نے میشا شفیع کی جانب سے عائد کیے جانے والے تمام الزامات مسترد کرتے ہوئے کہا تھا کہ جھوٹے الزامات پرعدالت سے رجوع کروں گا۔ پورا یقین ہے کہ سچ ہمیشہ غالب ہوتا ہے۔