Friday, December 3, 2021  | 27 Rabiulakhir, 1443

مصنوعی مہنگائی پر جلد قابو پاليا جائے گا، رضا باقر

SAMAA | - Posted: Oct 21, 2021 | Last Updated: 1 month ago
SAMAA |
Posted: Oct 21, 2021 | Last Updated: 1 month ago

فائل فوٹو

اسٹیٹ بینک آف پاکستان کے گورنر رضا باقر نے کہا ہے کہ پاکستان میں مہنگائی مصنوعی ہے جس پر جلد قابو پالیا جائے گا۔

 اسٹیٹ بینک کے گورنر نے برطانیہ کے شہر مانچسٹر میں صحافیوں کے ساتھ اپنی مختصر مصروفیت کے دوران پاکستان-آئی ایم ایف مذاکرات اور مہنگائی کے بارے میں بات کرتے ہوئے کہا کہ ایکسچینج ریٹ بڑھنے کی وجہ سے اشیاء کی قیمتوں میں اضافہ ہوا، تیل کی بڑھتی ہوئی قیمتوں نے پاکستان میں مہنگائی کو بھی بڑھایا ہے۔

پاکستان اور آئی ایم ایف مذاکرات کے حوالے سے بات کرتے ہوئے اُن کا کہنا تھا کہ آئی ايم ايف کے ساتھ ڈيل سے متعلق معاملات مثبت سمت ميں چل رہے ہيں، کوئی ايسی ڈيل نہيں کی جائے گی جس سے ملکی معيشت کو نقصان پہنچے اور مذاکرات ختم ہونے کے بعد ڈيل سب کے سامنے آئے گی۔

رضا باقر کا مزید کہنا تھا کہ پاکستان فیٹف کے حوالے سے بھی مثبت اقدامات کر رہا ہے اور پاکستان کا نام جلد ہی گرے لسٹ سے نکل جائے گا کیونکہ پاکستان نے فیٹف کی تمام شرائط پوری کر دی ہیں۔

فیٹف کا اجلاس

انسدادِ منی لانڈرنگ کے عالمی ادارے فنانشل ایکشن ٹاسک فورس (فیٹف) کا تین روزہ اجلاس 19 تا 21اکتوبر پیرس میں جاری رہے گا جس میں پاکستان کا نام گرے لسٹ میں رکھنے یا نکالنے کا فیصلہ کیا جائے گا۔

اجلاس میں منی لانڈرنگ، ٹیرر فنانسنگ کیخلاف اقدامات میں پیش رفت کا جائزہ لیا جا رہا ہے، فیٹف ٹیم پاکستان کی جانب سے ٹیرر فنانسنگ سمیت اب تک کی کارکردگی اور پاکستان کے زمینی حقائق اور قانون سازی کا جائزہ لے گی۔

آئی ایم ایف کی شرائط

 آئی ایم ایف پروگرام کی بحالی کے لیے مزید ٹیکس لگانے سمیت کئی شرائط پیش کر چکا ہے، جمعہ 8 اکتوبر کو عالمی مالیاتی فنڈ نے پاکستان سے بجلی، انکم ٹیکس، سیلز ٹیکس اور اضافی ریگولیٹری عائد کرنے کا مطالبہ کیا تھا۔

آئی ایم ایف کا مطالبہ تھا کہ حکومت ہر طرح کی سبسڈی ختم کرے یا اُس میں نمایاں کمی کرے،  ایف بی آر ریونیو اکٹھا کرنے کے حوالے سے مزید اقدامات کرے،  پاکستان میں نجکاری کے پروگرام کو تیز کیا جائے اور نقصان میں چلنے والی سرکاری کمپنیوں کی نیلامی کا ٹائم فریم فراہم کیا جائے۔

WhatsApp FaceBook
تازہ ترین
 
 
 
مقبول خبریں
مقبول خبریں
 
 
 
 
 
Facebook Twitter Youtube