عید پر نئے کرنسی نوٹ حاصل کرنے کا طریقہ

May 13, 2019

اسٹیٹ بینک آف پاکستان نے عید الفطر کے موقع پر نئے کرنسی نوٹ کے لیے ایس ایم ایس سروس دوبارہ شروع کرنے کا اعلان کردیا ہے۔

کیا آپ عید الفطر پر گھر بیٹھے نئے کرنسی نوٹ لینا چاہتے ہیں؟ تو پریشان نہ ہوں کیونکہ اب نئے کرنسی نوٹوں کا حصول آپ کی انگلیوں پر ہوگا۔ اسٹیٹ بینک آف پاکستان نے عید الفطر کے موقع پر نئے کرنسی نوٹ کے لیے ایس ایم ایس سروس دوبارہ شروع کرنے کا اعلان کیا ہے جس سے صارفین بیس مئی سے اکتیس مئی تک فائدہ اٹھا سکیں گے۔

 

نئے کرنسی نوٹ ملک کے ایک سو بیالیس شہروں میں سترہ سو کمرشل بینک برانچز کے ساتھ ساتھ آن لائن بینکنگ کے ذریعے بھی دستیاب ہوں گے۔

 

نئے نوٹوں کے حصول کے لیے ایس ایم ایس سروس پر صارفین کو اپنے شناختی کارڈ نمبر کے ساتھ بینک برانچ آئی ڈی نمبر کو 8877 پر ایس ایم ایس کرنا ہوگا۔

 

اس کے بعد صارف کو بینک کی جانب سے ٹرانزیکشن نمبر ایس ایم ایس کے ذریعے بھیجا جائے گا، جس کے ساتھ بینک برانچ کا ایڈریس اور تاریخ دی جائے گی تاکہ نئے نوٹ حاصل کیے جاسکیں۔

 

صارف کو نئے کرنسی نوٹ لینے کے لیے اصل شناختی کارڈ یا اسمارٹ کارڈ اور 8877 سے موصول ہونے والا کوڈ بھی ساتھ لانا ہوگا۔

 

ایک شناختی کارڈ نمبر اور موبائل نمبر کو صرف ایک بار ہی استعمال کیا جاسکے گا اور ایک آئی ڈی کارڈ نمبر کو مختلف موبائل نمبروں سے استعمال کرنے پر ٹرانزیکشن کوڈ جاری نہیں ہوگا۔

 

http://www.sbp.org.pkاپنے بینک کے برانچ کوڈ کی معلومات کیلئے اس لنک پر تفصیلات دیکھیں۔ ۔۔