ترشاوہ پھل کینسر ، بلند فشار خون ، کولیسٹرول سے بچاو کیلئے مددگار

فیصل آباد : زرعی و طبی ماہرین نے طویل تحقیق کے بعد انکشاف کیا ہے کہ ترشاو ہ پھل انسان کو کینسر ، بلند فشار خون اور کولیسٹرول جیسے امراض سے بچانے میں اہم کردار ادا کرنے کے ساتھ ساتھ انسانی جسم میں بھر پور قوت مدافعت پیدا کرنے کا بھی باعث بنتے ہیں۔

ماہرین کے مطابق ترشاوہ پھلوں کی غذائی و طبی خصوصیات پر تحقیق اور تجزیے سے پتہ چلا ہے کہ ان میں نہ صرف وٹامن سی اور اے بلکہ فولاد ، فاسفورس اور چونا بھی بڑی مقدار میں پایا جاتا ہے لہٰذا ان کا استعمال اور تازہ رس نہ صرف وٹا من سی ، اے وغیرہ کے حصول کا موثر زریعہ ہے بلکہ یہ قوت مدافعت میں بھی معاون ہے۔

مذکورہ ماہرین نے بتا یا کہ گریپ فروٹ کا استعمال شوگر کو کنٹرول کرنے میں معاون ہے کیونکہ اس میں پایا جانے والا کیروٹی نائیڈ ، فلے وی نوائیڈز ، نارنجن انسانی جسم کےلئے انتہائی مفید ہے۔

انہوں نے بتایا کہ پاکستان میں ترشاوہ پھلوں کے باغات کا رقبہ 198ہزار ہیکٹر تک پہنچ چکا ہے جس میں سے 60 فیصد پیداوار صرف ضلع سرگودھا سے حاصل ہوتی ہے ۔

انہوں نے بتایا کہ ترشاوہ باغات سے تقریباً 25ہزار ٹن پیداوار حاصل ہوتی ہے لیکن اس کا صرف 10 فیصد حصہ برآمد کیا جاتا ہے، انہوں نے کہا کہ اگر باغبان زرعی ماہرین کی مشاورت سے ترشاوہ پھلوں کے بیج ، کھادوں کا استعمال کریں تو وہ بہتر پیداوار حاصل کر سکتے ہیں۔ سماء