انتخابی اصلاحات ایکٹ کیخلاف اپیلیں سماعت کیلئے منظور

اسلام آباد : سپریم کورٹ آف پاکستان نے انتخابی اصلاحات ایکٹ کیخلاف تمام اپیلیں سماعت کیلئے مقرر کرنے کا حکم دے دیا۔

تفصیلات کے مطابق چیف جسٹس پاکستان نے انتخابی اصلاحات ایکٹ 2017 کیخلاف تمام اپیلیں سماعت کیلئے مقرر کرنے کا حکم دے دیا ہے، چیف جسٹس نے اپیلوں پر عائد رجسٹرار آفس کے اعتراضات بھی ختم کر دیئے۔

انتخابی اصلاحات ایکٹ 2017 کو پیپلزپارٹی، پی ٹی آئی اور شیخ رشید احمد نے چیلنج کر رکھا ہے۔ چیف جسٹس پاکستان میاں ثاقب نثار اپیلوں کی ان چیمبر سماعت میں رجسٹرار آفس کے اعتراضات ختم کر دیے۔

واضح رہے کہ رجسٹرار آفس نے درخواستوں پر متعلقہ فورم سے رجوع کرنے کا اعتراض لگایا تھا۔ پیپلز پارٹی، پی ٹی آئی، شیخ رشید اور جمشید دستی سمیت 9 درخواست گزاروں نے الیکشن ایکٹ 2017کو چیلنج کیا تھا، رجسٹرار آفس نے تمام درخواستوں پر اعتراضات لگائے تھے، درخواست گزاروں نے اعتراضات کیخلاف ان چیمبر میں اپیلیں دائر کی تھیں۔

دیگر درخواست گزاروں میں عادم آدمی پارٹی، جسٹس اینڈ ڈیمو کریٹک پارٹی، جسٹس پارٹی، داؤد غزنوی اور ذوالفقار بھٹہ ایڈووکیٹ بھی شامل ہیں۔ سماء