صولت مرزا کی پھانسی 90روز تک مؤخر کرنے کی سمری تیار

ویب ایڈیٹر :

اسلام آباد :   وزارت داخلہ  کی جانب سے سزائے موت کے منتظرایم کیو ایم کے کارکن صولت مرزا کی پھانسی 90 دن کے لئے رکوانے کی سمری وزیراعظم کو ارسال کردی۔

کراچی الیکٹرک سپلائی کمپنی کے سابق منیجنگ ڈائریکٹرملک شاہد حامد  کے قتل میں سزائے موت پانے والے ایم کیو ایم کے کارکن صولت مرزا کی پھانسی 90 روز روکنے کے لئے وزارت داخلہ نے سمری وزیراعظم کو ارسال کردی جب کہ وزارت داخلہ کا کہنا ہے کہ صولت مرزا کے بیان کی باقائدہ تفتیش کی ضرورت ہے اور مجرم کے انکشافات کی تفتیش کے لئے مشترکہ تحقیقاتی کمیٹی بھی تشکیل دی جائے گی۔

واضح رہے کہ بلوچستان کی مچھ جیل میں قید مجرم صولت مرزا کو گزشتہ روز تختہ دار پرلٹکایا جانا تھا تاہم پھانسی سے چند گھنٹے قبل مجرم کا ویڈیو پیغام منظرعام پرآیا جس میں مجرم نے ایم کیو ایم کے قائد الطاف حسین اور گورنر سندھ ڈاکٹر عشرت العباد خان پرسنگین الزامات عائد کئے جس کے بعد مجرم کی پھانسی 72 گھنٹے کے لئے روک دی گئی تھی۔

دوسری جانب سزائے موت کے منتظر ایک اور قیدی شفقت حسین کی پھانسی موخر کرنے کی سمری بھی ایوان صدر بھيجي گئی ہے۔ ذرائع کے مطابق شفقت حسین بظاہر سات ماہ کے بچے کے قتل میں ملوث نہیں،  وہ صرف اس کے والدین کو بچے کی لاش کی جگہ تک لے کر گیا تھا ۔