وٹامن بی 12 اور بی 6 کی زیادتی سے پھیپھڑوں کے سرطان کا خطرہ

 واشنگٹن : امریکی طبی ماہرین نے انکشاف کیا ہے کہ وٹامن بی 12 اور بی 6 کی زیادہ مقدار لینے والے سگریٹ نوشوں کو پھیپھڑوں کا سرطان لاحق ہونے کا زیادہ خطرہ ہوتا ہے۔

امریکی جرنل آف کلینیکل اونکالوجی کی رپورٹ کے مطابق تحقیقی ٹیم کے سربراہ تھیوڈور براسکی نے کہا ہے کہ ایسے سگریٹ نوش افراد جو 10 سالوں تک وٹامنز کے غذائی سپلیمینٹس خصوصاً وٹامن بی 12 اور بی 6 لیتے رہے ہوں، انہیں پھیپھڑوں کا سرطان لاحق ہونے کا امکان دوسروں کی نسبت 3 گنا زیادہ ہوتا ہے۔

تھیوڈور براسکی نے بتایا کہ ایک دہائی سے زیادہ عرصہ میں پھیپھڑوں کے سرطان میں مبتلا 77000 مریضوں کا مطالعاتی جائزہ لیا گیا، جن میں سے اکثر وٹامن بی 12 اور بی 6 کی یومیہ مقررہ مقدار سے زیادہ لیتے رہے۔ اے پی پی