جادوئی چھری
کراچی کے جناح اسپتال میں درجنوں عمارتیں ہیں، مختلف ڈپارٹمنٹس میں علاج کی سہولیات ہیں لیکن ایک بلڈنگ ایسی ہے جہاں ملنے والی علاج کی مفت سہولت دنیا بھر میں کہیں نہیں ۔یہ ایسا جادوئی علاج ہے جو صرف چند گھنٹے میں کیسنر سے مکمل نجات دلا دیتا ہے۔ سرجری ہوتی ہے نہ ہی کوئی تکلیف ۔ خاص بات یہ ہے کہ پچاس لاکھ کی اس ٹریٹمنٹ پر مریض کا ایک پیسہ بھی خرچ نہیں ہوتا ۔
ذکر ہورہا ہے ، سائبر نائف کا ۔۔ ایک ایسا روبوٹ جو ٹیومر کا جڑ سے خاتمہ کردیتا ہے،سائبر نائف سے بیک وقت بارہ سو اینگل سے شعاعیں نکلتیں ہیں جس کے باعث ٹیومر کا شکار ، ریڈیو سرجری کی نسبت زیادہ آسان اور محفوظ ہوتا ہے ۔ اور کامیابی کی شرح ننانوے فیصد تک ہے ۔ یہاں علاج کے لئے کسی کی سفارش کی ضرورت ہے ، نہ ہی کوئی طویل انتظار کی جھنجھٹ ۔
ڈاکٹرز کے مطابق اسٹیج ون اور ٹو کے کینسر کے مریضوں کا علاج سائبر نائف سے ممکن ہے ۔ مریض کی آنکھوں کے سامنے روبوٹ اپنا کام انجام دیتا ہے اور چند ہی گھنٹوں میں مریض صحت یاب ہو کر اسپتال سے گھر روانہ ہوجاتا ہے ۔جادوئی چھری سے ہونے والا علاج تو حیران کن ہے ، ساتھ ہی اس ادارے کا قیام بھی کسی معجزے سے کم نہیں ۔
قریبا سات سال قبل ، پاکستانی کا امریکا میں سائبر نائف کے ذریعے کامیاب علاج ہوا ۔ صحت یاب ہونے والے نوجوان نے چالیس کروڑ روپے سے زائد کے روبوٹ سائبر نائف کو پاکستان لانے کی خواہش کا اظہار ساتھیوں سے کیا ، خواہش کو حقیقت کا روپ دینے کے لئے پاکستان ایڈ اینڈ فاؤنڈیشن میدان میں اتری ، کارواں آگے بڑھتا گیا ، قافلہ بنتا گیا ، آخر میں جب سات آٹھ کروڑ کا خسارہ رہا تو ، ایدھی صاحب نے صرف ایک سوال پر بھاری رقم عطیہ کردی ، کہ ( کیا اس سے غریبوں کا مفت علاج ممکن ہوگا)۔
پانچ سال کے دوران ۔ پانچ ہزار افراد سائبر نائف سے مستفید ہوئے جن میں بیرون ملک سے آنے والے مریض بھی شامل ہیں ۔سب سے خاص بات کے دنیا میں صرف ڈھائی سو سائبر نائف روبوٹس ہیں۔ اس میں سے صرف پاکستان وہ واحد ملک ہے جہاں پچاس لاکھ روپے کی سرجری بلکل مفت کی جاتی ہے ۔یہی نہیں اس ادارے میں روز بروز ٹکنالوجی میں اضافہ ہورہا ہے ۔ حال ہی میں پیٹ اسکین مشین بھی نصب کردی گئی ہے۔
جناح اسپتال کا سائبر نائف صرف کینسر کے مریضوں کو شفا نہیں دیتا بلکہ نفسا نفسی کے اس دور میں سسکتی انسانیت کو سیکھ بھی دیتا ہے کہ جب نیتیں بلند ہوں ، ارادے مضبوط اورفرائض کی انجام دہی میں خلوص ہو تو روبوٹ بھی معجزہ کرسکتا ہے ۔
JInnah Hospital
cancer treatment
