جی ٹی روڈروانگی کیلئےنواز شریف کی سیکیورٹی کیسی ہوگی؟

اسلام آباد / لاہور : وفاقی وزیر داخلہ احسن اقبال نے نواز شریف سے پنجاب ہاؤس میں ملاقات کے دوران جی ٹی روڈ روانگی سے متعلق لائحہ عمل طے کرلیا،  ریلی کے اطراف میں ہزاروں پولیس اہلکار، جب کہ ایلیٹ کمانڈوز بھی تعینات ہونگے۔ سماء کے مطابق وفاقی وزیر داخلہ احسن اقبال نے نواز شریف سے منگل کے روز پنجاب ہاؤس میں ملاقات کی، ملاقات میں جی ٹی روڈ روانگی اور ریلی سے متعلق حتمی انتظامات پر نواز شریف کو اعتماد میں لیا گیا۔

ملاقات میں نواز شریف کی لاہور روانگی کیلئے تیار کیا گیا سیکورٹی پلان پر بریف کیا گیا، پلان کے مطابق ریلی کے راستوں پر 4 ہزار سے زائد پولیس اہلکار تعینات ہوں گے۔ نواز شریف کی گاڑی کے اطراف ایلیٹ فورس کے کمانڈوز ڈیوٹی دیں گے۔ سیکیورٹی سے متعلق حکام کا کہنا تھا کہ جلوس کے راستوں میں بڑی عمارتوں پر پولیس کمانڈوز تعینات ہوں گے، نواز شریف کی ریلی دن11بجے فیض آباد سے مری روڈ میں داخل ہوگی۔

نواز شریف ریلی کے ہمراہ فیض آباد، شمس آباد، رحمان آباد، چاندنی چوک سے ہوتے ہوئے لیاقت باغ پہنچیں گے۔ ریلی مریڑھ چوک سے کچہری چوک، سواں سے ہوتی ہوئی ٹی چوک پہنچے گی۔

نوازشریف کا رحمان آباد اور کچہری چوک پر خطاب کرنے کا بھی امکان ہے، ریلی فیض آباد پہنچنے پرمری روڈ ہرقسم کی ٹریفک کیلئے بند ہوگی، جب کہ میٹرو بس سروس بند کرنے سے متعلق فیصلہ آج کمشنر کی زیرصدارت اجلاس میں ہوگا۔ سماء