باہر بیٹھا ڈکٹیٹر ملک میں آمریت کی وکالت کررہا ہے

اسلام آباد : برطرف وزیراعظم نواز شریف نے الزام عائد کرتے ہوئے کہا ہے کہ مجھے سابق صدر پرویز مشرف سے ملوانے کی کوشش کی گئی، کہا گیا کہ مشرف سے ملاقات آپ کے مفاد میں ہے، آمریت کی وکالت کرنے والا ملک میں آنے کی جرات نہیں کرتا، انہوں نے سوال کرتے ہوئے کہا کہ کیا ملک توڑنے والوں کو بھی کبھی سزا مل سکے گی؟۔ پنجاب ہاؤس اسلام آباد میں برطرف وزیراعظم نواز شریف نے  اے پی این ایس، سی پی این ای اور پی بی اے سمیت دیگر اخبار نویسوں سے ملاقات کیں۔

ملاقا کے دوران غیر رسمی گفت گو میں سابق وزیراعظم کا کہنا تھا کہ جمہوری نظام میں میڈیا کا کردار اہمیت کا حامل ہے، میڈیا معلومات کی فراہمی میں ذمہ دارانہ رویہ اختیار کرے، انہوں نے کہا کہ کوئی کرپشن نہیں کی، باہر بیٹھا ڈکٹیٹر ملک میں آمریت کی وکالت کر رہا ہے، پاکستان قائم ہےتو ہم سب ہیں،انتشار سے کچھ نہیں بچے گا۔ نواز شریف کا کہنا تھا کہ بیٹے کی کمپنی سے تنخواہ کی وصولی نہ کرنا جرم بنا دیا گیا، جب تنخواہ لی ہی نہیں تو ظاہر کیسے کرتے، کیا ملک توڑنے والوں کو کبھی سزا مل سکے گی؟ قوم دیکھنا چاہتی ہے کہ آمروں کو کب سزا ملے گی، مجھے پرویز مشرف سے ملوانے کی کوشش کی گئی، کہا گیا مشرف سے ملاقات آپ کے مفاد میں ہے، کہا گیا شاید وہ کوئی این آر او کرانا چاہتے ہیں،ملاقات سے انکار کیا۔

عمران خان کی طرف اشارہ کرتے ہوئے سابق وزیراعظم کا کہنا تھا کہ دھرنے والوں کو اُن کی زبان میں جواب نہیں دیا،کیا غلط کیا۔

نواز شریف نے کہا ہے کہ جو کچھ ہوا وہ سب آپ کے سامنے ہے، کوئی کرپشن، کک بیک یاسرکاری خزانے میں کرپشن کی ہوتی تو کوئی بات تھی،ثبوت تو دور کی بات کرپشن کا الزام تک نہیں ہے، ایک بیٹے نے پیسے باہر سے بھجوائے،دوسرے بیٹےسے تنخواہ نہیں لی،اس پر اعتراض سمجھ سے بالاتر ہے،کسی وزیراعظم سے اس بڑا اور کیا مذاق ہوسکتا ہے۔

انہوں نے کہا کہ باپ دادا کی کمپنیوں کو ٹٹولا گیا لیکن پھر بھی کرپشن ثابت نہیں ہوئی۔ واضح رہے کہ قبل ازیں نوازشریف اپنے اہل خانہ کے ساتھ چھانگلا گلی سے اسلام آباد پہنچے، جہاں لیگی کارکنوں کی جانب سے ان کا بھرپور استقبال کیا گیا تھا۔ سماء