اپوزیشن کی مشترکا امیدوار کی کوشش،اجلاس آج پھرہوگا

اسلام آباد: نئے وزیراعظم کے انتخاب کیلئے اپوزیشن کسی ایک امیدوار پر متفق نہ ہوسکی، جس کے بعد مشترکہ امیدوار لانے کیلئے ایک بار پھر اجلاس آج صبح 10 بجے ہوگا۔ سماء کے مطابق مشترکا امیدوار کی کوشش میں اپوزیشن جماعتوں کا ایک اجلاس آج صبح 10 بجے پھر ہوگا، اور پھر ملک کا 18 واں وزیر اعظم کون ہوگا یہ آج معلوم ہوجائے گا۔ وزارت عظمیٰ کا تاج سر پہ سجانے کیلئے پانچ سیاسی جماعتوں کے چھ امیدواروں نے کاغذات نامزدگی جمع کرائے۔ اپوزیشن کوئی مشترکا امیدوار نہ لاسکی، جب کہ پاکستان تحریک انصاف مشاورت سے پہلے ہی شیخ رشید کو اپنا امیدوار بنا کر سامنے لے آئی، تو باقی دیگر جماعتیں ناراض ہو گئیں۔ رہی سہی کسر یوم تشکر کے موقع پر پی ٹی آئی چیئرمین عمران خان کے خطاب میں آصف علی زرداری پر پے درپے وار نے پوری کردی، جس کے بعد قائد حزب اختلاف خورشید شاہ کے چیمبر میں اپوزیشن جماعتوں کا کئی گھنٹے جاری رہنے والا اجلاس بے نتیجہ ختم ہوگیا۔ واضح رہے کہ شاہد خاقان عباسی امیداوار مسلم لیگ نواز، سید خورشید شاہ امیدوار پاکستان پیپلز پارٹی، سید نوید قمر امیدوار پاکستان پیپلز پارٹی، شیخ رشید احمد امید وار پاکستان تحریک انصاف، صاحبزادہ طارق اللہ امیدوار جماعت اسلامی اور کشور زہرا امیدوار ایم کیو ایم پاکستان نےاپنے ساتھی ارکان کے ہمراہ کاغذات نامذدگی جمع کرائے۔ اسپیکر سردار ایاز صادق نے تمام کے کاغذات نامزدگی اسکروٹنی کے بعد منظور کر لیے، تاہم حتمی امیدواروں کے درمیان قومی اسمبلی اجلاس میں رائے شماری آج سہ پہر 3 بجے ہو گی۔ سماء