قومی اسمبلی، اپوزیشن کا ترقیاتی فنڈز کی غیر منصفانہ تقسیم پر واک آؤٹ

اسٹاف رپورٹ

اسلام آباد : اپوزیشن نے حکومتی ارکان کے مقابلے میں کم ترقیاتی فنڈز اور خواتین کو ترقیاتی فنڈ کی عدم فراہمی پر قومی اسمبلی سے واک آؤٹ کردیا، اپوزیشن لیڈر خورشید شاہ کہتے ہیں فنڈز برابری کی بنیاد پر دیئے جائیں، ورنہ نہ ہی دیئے جائیں۔ وزیر مملکت شیخ آفتاب کہتے ہیں اتفاق فاؤنڈری نے سریا بنانا چھوڑ دیا، اب پاکستان بنارہے ہیں۔

اپوزیشن لیڈر خورشید شاہ نے قومی اسمبلی اجلاس میں اپوزیشن ارکان کو کم فنڈز دینے کا معاملہ اٹھایا، انہوں نے کہا کہ اپوزیشن ارکان کو 2 کروڑ اور حکومتی ارکان کو 5 کروڑ ترقیاتی فنڈز دیئے گئے ہیں، یہ امتیازی سلوک ناقابل برداشت ہے، فنڈز برابری کی بنیاد پر دیئے جائیں، ورنہ نہ ہی دیئے جائیں۔

انہوں نے کہا کہ ترقیاتی فنڈز کے معاملے پر خواتین ارکان کے ساتھ ہیں، اگر انہیں فنڈز نہ دیئے گئے تو وہ اپنے فنڈز بھی واپس کردیں گے، فنڈز کے معاملے پر اپوزیشن اور خواتین ارکان نے ایوان سے واک آؤٹ کیا۔

ایوان میں اتفاق فاؤنڈری کا چرچا بھی ہوا، پیپلز پارٹی کے منور تالپور نے سوال اٹھایا کہ کیا میٹرو منصوبے میں اتفاق فاؤنڈری کا لوہا اور سیمنٹ میاں منشا کا استعمال ہورہا ہے۔

اس پر وزیر مملکت شیخ آفتاب نے بتایا کہ اتفاق فاؤنڈری نے سریا بنانا چھوڑ دیا، اب پاکستان بنارہے ہیں، راولپنڈی، اسلام آباد میٹرو بس منصوبہ دھرنوں کی وجہ سے تاخیر کا شکار ہوا، تاخیر کے باوجود منصوبہ مقررہ لاگت 44 ارب روپے میں مکمل ہوگا۔

ایوان نے انڈس ریور سسٹم اتھارٹی ترمیمی بل 2015ء مسترد کردیا، قواعد میں ترمیم سے متعلق انسداد زنا بالجبر ترمیمی بل اور غیرت کے نام پر قتل کی روک تھام کے قوانین کے ترمیمی بل پیش کئے گئے، اسپیکر نے بل متعلقہ کمیٹی  کے حوالے کردیئے، اجلاس بدھ کی صبح ساڑھے 10 بجے تک ملتوی کردیا گیا۔ سماء