پی ایس ایکس میں مندی، انڈیکس 358 پوائنٹس گر گیا

کراچی : پاکستان اسٹاک ایکسچینج (پی ایس ایکس) میں مندی کا رجحان رہا، کے ایس ای 100 انڈیکس 358.78 پوائنٹس کی کمی سے 45059.93 پوائنٹس پر بند ہوا۔

پاکستان اسٹاک ایکسچینج میں 358 پوائنٹس کی شدید مندی رہی، کے ایس ای 100 انڈیکس 45059 پوائنٹس کی سطح پر بند ہوا، مارکیٹ سرمایہ میں 45 ارب 41 کروڑ 48 لاکھ 3 ہزار 788 روپے کی کمی رہی جبکہ تجارتی حجم میں بھی 30 کروڑ 73 لاکھ 38 ہزار 729 روپے کی کمی ریکارڈ کی گئی۔

تفصیلات کے مطابق کاروباری ہفتے کے چوتھے روز پی ایس ایکس میں حصص کی فروخت کے دباﺅ اور مارکیٹ کریکشن کے باعث مندی کا رجحان رہا اور کے ایس ای 100 انڈیکس 358.78 پوائنٹس کی کمی سے 45059.93 پوائنٹس پر بند ہوا جبکہ کے ایس ای 30 انڈیکس بھی 178.80 پوائنٹس کی مندی سے 23491.48 پوائنٹس پر بند ہوا، اسی طرح کے ایس سی آل شیئر انڈیکس میں 155.04 پوائنٹس کی کمی ریکارڈ کی گئی جبکہ کے ایم آئی 30 انڈیکس میں 702.34 پوائنٹس کی مندی رونماء ہوئی۔

مزید برآں بینکس ٹریڈ ایبل (بی اے ٹی آئی) انڈیکس 78.69 پوائنٹس کی کمی سے 18427.78 پوائنٹس پر بند ہوا تاہم آئل اینڈ گیس ٹریڈ ایبل (او جی ٹی آئی) انڈیکس 130.93 پوائنٹس کے اضافے سے 16953.25 پوائنٹس پر بند ہوا، پی ایس ایکس - کے ایم آئی انڈیکس 109.05 پوائنٹس کی کمی سے 21847.53 پوائنٹس پر بند ہوا۔

مارکیٹ میں مجموعی طور پر 360 کمپنیوں کے حصص کا لین دین ہوا جن میں سے 99 کمپنیوں کے حصص کی قیمتوں میں تیزی، 243 کمپنیوں کے حصص کے بھاﺅ میں مندی، 18 کمپنیوں کے حصص کی قیمتوں میں استحکام رہا۔ سماء / اے پی پی