اسلام آباد : حکومت نے چوتھا فور جی اسپیکٹرم لائسنس ساڑھے 29 کروڑ ڈالر میں فروخت کردیا۔ اسلام آباد میں مشترکا پریس کانفرنس سے خطاب میں وفاقی وزیر خزانہ اسحاق ڈار اور وزیر مملکت برائے ٹیلی کام انوشہ رحمان نے بتایا کہ پاکستان میں چوتھا فور جی اسپیکٹرم لائسنس ساڑھے 29کروڑ ڈالر میں فروخت کردیا گیا ہے، جس کے ذریعے پاکستان میں موبائل فون کے کروڑوں صارفین کو فور جی کی سہولت میسر آسکے گی۔

مشترکا پریس کانفرنس کے موقع پر ٹیلی کام حکام اور نجی موبائل فون کمپنی کے درمیان لائسنس کے اجراء کا معاہدہ بھی ہوا۔ وزرا کے مطابق فور جی لائسنس کی نیلامی سے قومی خزانے کو ساڑھے 29کروڑ ڈالر کی نان ٹیکس آمدنی حاصل ہوئی ہے۔ اسحاق داڑ کا کہنا تھا کہ نجی کمپنی نے فور جی اسپیکٹرم لائسنس کی پوری رقم یک مشت ادا کردی ہے اور وہ جولائی سے فور جی کا باقاعدہ آغاز کرسکے گی۔ فور جی لائسنس کے اجراء سے نجی موبائل فون کمپنی کے کروڑوں صارفین کو فائدہ ہوگا اور انہیں تیز ترین انٹرنیٹ کی سہولت میسر ہوسکے گی۔ سماء