قطر کو دہشتگردوں کا سہولت کار قرار دیدیا گیا

واشنگٹن : امریکی صدر ڈونلڈ ٹرمپ نے قطر کو دہشت گردوں کا پرانا سہولت کار قرار دیتے ہوئے کہا ہے کہ قطر دہشت گردوں کی مالی معاونت چھوڑ دے۔ غیر ملکی خبر رساں ایجنسی ایسوسیٹ پریس (اے پی) کے مطابق امریکی صدر ڈونلڈ ٹرمپ نے قطر کو دہشت گردوں کا پرانا سہولت کار قرار دے دیا، وائٹ ہاؤس میں پریس کانفرنس کے دوران امریکی صدر نے قطر اور اس کے ہمسایہ ملک پر زور دیا کہ وہ دہشت گردی کے خلاف مزید اقدامات کریں۔ انہوں نے کہا کہ قطر کو دہشت گردوں کی مالی معاونت ختم کرنا ہوگی۔

اس سے قبل ٹرمپ اور مصر کے صدر عبدالفتاح السیسی کے درمیان فون پر بات چیت ہوئی۔ امریکی وزیر خارجہ ریکس ٹلرسن کے مطابق انہوں نے سعودی عرب اور اس کے عرب اتحادی ممالک پر زور دیا ہے کہ وہ قطر کی ناکہ بندی میں نرمی کریں، کیونکہ اس کے نتیجے میں نہ صرف ملک میں خوراک کی کمی اور انسانی بحران پیدا ہورہا ہے، بلکہ دہشت گردی کے خلاف جنگ کے متاثر ہونے کا بھی خدشہ ہے۔ دوسری جانب ترک صدر کا کہنا ہے کہ ان کے علم میں نہیں کہ قطر نے کبھی دہشت گرد تنظیموں کی مدد کی ہو،نہ کبھی ایسے کوئی ثبوت سامنے آئے۔ انہوں نے مطالبہ کیا کہ قطر کی ناکہ بندی فوری طور پر ختم کی جائے۔ امریکا میں متحدہ عرب امارات کے سفیر یوسف العتیبہ کا کہنا تھا کہ قطر کو دہشتگردوں کی معاونت اور اس حوالے سے پائی جانے والی تشویش کا اعتراف کرنا ہوگا اور متحدہ عرب امارات قطر کے معاملے پر امریکا کے ساتھ ہے۔

قطر کے خلاف مزید پابندیوں کو سخت کرتے ہوئے سعودی عرب نے تمام ہوٹلوں اور فرنیشڈ اپارٹمنٹ میں قطری نیوز چینل پر پابندی لگا دی ہے۔ سماء