خیبر ایجنسی میں ریموٹ کنٹرول بم دھماکا

پارا چنار : خیبر ایجنسی میں ریموٹ کنٹرول بم دھماکے میں امن کمیٹی کے رضا کاروں سمیت 5افراد جاں بحق،جب کہ متعدد زخمی ہوگئے۔ پولیٹیکل انتظامیہ کے مطابق خیبر ایجنسی میں ریموٹ کنٹرول بم دھماکے کے نتیجہ میں پانچ افراد جاں بحق اور متعدد زخمی ہوگئے۔ خیبر ایجنسی کے علاقے وادی تیراہ میں خیل کے مقام پر امن کمیٹی کی گاڑی کو اس وقت ریموٹ کنٹرول بم سے نشانہ بنایا گیا جب وہ دفتر سے مسجد کی جانب جا رہی تھی۔ دھماکے کے نتیجہ میں امن کمیٹی کے دو رضا کاروں سمیت 5 افراد موقع پر جاں بحق اور متعدد زخمی ہوگئے۔ زخمیوں کو طبی امداد کے لئے قریبی ہسپتال منتقل کر دیا گیا ہے۔ سیکیورٹی فورسز نے علاقے کو گھیرے میں لے کر تحقیقات شروع کر دی ہیں۔ سماء