حج 2017: درخواست گزاروں کو ایس ایم ایس موصول ہوجائے گا

اسلام آباد: رواں برس قرعہ اندازی کے ذریعے ایک لاکھ 79 ہزار عازمین کو حج کی سعادت نصیب ہوگی، درخواست گزاروں کو ایس ایم ایس کے زریعے مطلع کیا جائے گا ۔

حج 2017 کیلئے سرکاری سکیم کے تحت کمپوٹرائزڈ قرعہ اندازی آج وزارت مذہبی امور میں ہوگی ۔ رواں برس سرکاری سکیم کے تحت ایک لاکھ سات ہزار 526 خوش نصیب فریضہ حج کی سعادت حاصل کریں گے جبکہ امسال مجموعی طورپر تین لاکھ 38 ہزار 682 درخواستیں جمع کرائی گئی ہیں۔

وفاقی وزیر مذہبی امورسردارمحمد یوسف نما زجمعہ کے بعد قرعہ اندازی کریں گے اور درخواست گزاروں کو ایس ایم ایس اورخطوط کے ذریعے آگاہ کیاجائے گا، مجموعی طور پر سرکاری اورنجی سکیم میں ایک لاکھ 79ہزار افرادفریضہ حج کی سعادت حاصل کریں گے ۔

حج 2017ء کےلئے سرکاری کوٹہ اسکیم کے تحت آزاد کشمیر اور گلگت بلتستان سمیت ملک بھر سے مجموعی طور پر تین لاکھ 38 ہزار 682 درخواستیں جمع کرائی گئی ہیں۔

وزارت مذہبی امور کے مطابق آزاد کشمیر سے 2 ہزار 622، بلوچستان سے 6 ہزار 116، فاٹا سے 6 ہزار، گلگت بلتستان سے 5 ہزار 84، اسلام آباد سے 10 ہزار 333، خیبر پختونخوا سے 69 ہزار 779، پنجاب سے 1 لاکھ 55 ہزار 814، سندھ سے 72 ہزار 934 درخواستیں موصول ہوئی ہیں۔

درخواستوں کی وصولی کا کام 17 اپریل سے 26 اپریل تک جاری رہا۔ رواں سال ایک لاکھ 7 ہزار 500 سے زائد افراد سرکاری سکیم جبکہ مجموعی طور پر ایک لاکھ 79 ہزار 210 پاکستانی حج کی سعادت حاصل کریں گے۔ سماء