پاک فوج نےوزیرستان میں معجزہ کردیا،برطانوی میڈیاکااعتراف

لندن : برطانوی صحافی نے اس بات کا اعتراف کرلیا کہ پاک فوج کو شمالی وزیرستان میں بے پناہ کامیابیاں ملی ہیں، پاک فوج نے وزیرستان میں دہشت گردوں کو نکال کر معجزہ کردیا، پاکستان نے دنیا کو امید دیدی ہے۔ ڈیلی میل سے وابستہ صحافی پیٹربورن نے کئی سال بعد شورش زدہ علاقے میں قدم رکھا،انہوں نے ایک تحریر میں اعتراف کیا ہے کہ اتنے بڑے پیمانے پر دہشت گردوارداتوں کے بعد امن کی جانب بڑھتاپاکستان کسی معجزے سے کم نہیں۔

برطانوی اخبار میل آئن لائن میں شائع تازہ رپورٹ کے مطابق غیر ملکی میڈیا دہشت گردی کیخلاف پاک فوج کی کامیابیوں پر حیران رہ گیا، برطانوی صحافی نے وزیرستان کا آنکھوں دیکھا حال سنا ڈالا۔ برطانوی اخبار کا کہنا ہے کہ پاک فوج نے دنیا کے خطرناک ترین علاقے سے دہشت گردوں کو نکال دیا، مشکل ترین حالات سے پاک فوج کا کامیابی سے نکلنا معجزے سے کم نہیں۔

اخبار کے مطابق ایک وہ وقت تھا کہ جب دنیا کی خفیہ ایجینسز پاکستان کے ٹوٹنے کی پیش گوئیاں کرتی تھیں، تاہم پاکستان نے ثابت کردیا کہ دہشت گردی کا خاتمہ ممکن ہے اور یہ اس صدی کا معجزہ ہے۔

برطانوی اخبار کا یہ بھی کہنا ہے کہ اب شکست خوردہ دہشت گرد پاکستان کے عام عوام کو نشانہ بنا رہے ہیں، نائن الیون کے بعد شمالی وزیرستان القاعدہ اور کالعدم طالبان کا گڑھ تھا، تاہم پاک افواج نے کامیاب کارروائیوں کے بعد دہشت گردوں کو وزیرستان سے نکال پھینکا، پاک فوج کی وزیرستان میں کامیاب کارروائی اس بات کی امید ہے اور ایک امید کی کہانی ہے کہ دہشت گردی کو شکست دی جاسکتی ہے۔

انہوں نے اپنے دورہ شمالی وزیرستان سے متعلق مزید لکھا کہ کسی زمانے میں برطانیہ، امریکا اور دنیا کے مختلف حصوں میں دہشت گرد حملوں کی منصوبہ بندی کے مرکز تباہ اور دہشت گرد مارے جاچکے ہیں، میران شاہ سے دہشت گرد نکل کر افغانستان فرارہوچکے ہیں۔

برطانوی صحافی کے مطابق امریکا اور برطانیہ کی افغانستان میں یلغار کے بعد قبائلی علاقوں میں چھپنے والے ان جنگجوؤں نے غیرملکی فوج پر حملے کے ساتھ ساتھ پاکستان میں بھی دہشت گردی کی بڑی کارروائیاں کیں۔

پیٹر بورن پاک افواج کی کامیابیوں کا تذکرہ کرتے ہوئے لکھتا ہے کہ چند سال قبل پاکستان کا معاشی مرکز کراچی دنیا بھر کےخطرناک شہروں میں چھٹے درجے پر موجود تھا ،لیکن حالیہ آپریشن کے بعد درجہ بندی میں اس کا نمبر 32واں ہے۔

Winning the war on terror in the badlands of Pakistan https://t.co/8UkyPUTFQu via @MailOnline

— Peter Oborne (@OborneTweets) March 3, 2017

برطانوی صحافی نے علاقے میں اسکولوں، اسپتالوں اور بازاروں کی تعمیر کو سراہتے ہوئے لکھا ہے کہ دہشتگردی سے نجات پاتا پاکستان دنیا بھر کے لیے امید کی کرن ہے۔ سماء

پاک فوج کی جانب سے وزیرستان کی بحالی کے اقدامات پر ایک نظر