وزیراعظم کی سرکلر ریلوے اور لیاری ایکسپریس وے کیلئے سندھ کو مکمل تعاون کی یقین دہانی

اسٹاف رپورٹ

کراچی : وزیراعظم کی سربراہی میں کراچی کے میگا منصوبوں پر بھی اجلاس ہوا، لیاری ایکپریس وے کا منصوبہ مکمل نہ ہونے پر وزیراعظم چیف سیکریٹری پر ناراض ہوئے، نواز شریف نے سندھ حکومت کو سرکلر ریلوے اور لیاری ایکسپریس وے کیلئے وفاق کے تعاون کی یقین دہانی کرادی۔

کراچی کے بڑے منصوبے زیر بحث آئے گورنر ہاؤس میں وزیراعظم نواز شریف کی سربراہی میں اجلاس کے دوران، گورنر و وزیراعلیٰ سندھ، خواجہ سعد رفیق، ایڈمنسٹریٹر و کمشنر کراچی، چیف سیکریٹری سندھ  اجلاس میں شریک تھے، وزیراعظم کو بریفنگ دیتے ہوئے خواجہ سعد رفیق نے بتایا کہ

کراچی سرکلر ریلوے کا 8 کلو میٹر حصہ اب تک خالی نہیں کرایا جاسکا، منصوبے کی راہ میں 4700 مکانات حائل ہیں، حکومت سندھ نے جائیکا کو یقین دہانی کروائی ہے کہ وہ جلد از جلد جگہ خالی کروا کر دے گی۔

ایڈمنسٹریٹر کراچی رؤف اختر فاروقی نے بریفنگ دی کہ لیاری ایکسپریس وے کے صرف 5 کلو میٹر حصے کی تعمیر باقی ہے، حکومت سندھ متاثرین کو معاوضہ دے تو 3 کلو میٹر کا حصہ فوری تعمیر ہوسکتا ہے، ڈسٹرکٹ سینٹرل میں آبادیوں کا سروے مکمل ہے، معاوضے کی لسٹیں تیار ہیں، لیکن ایک سال سے کوئی پیشرفت نہیں ہوئی۔

وزیراعظم نواز شریف نے بریفنگ سن کر چیف سیکریٹری سندھ  کی جانب رخ کیا اور بولے، چیف سیکریٹری صاحب آپ سن رہے ہیں نا، اربوں روپے کا منصوبہ ضائع ہورہا ہے، سرکلر ریلوے پر سندھ حکومت جائیکا کی شرائط پوری کردے، وفاق مکمل تعاون کرے گا۔

انہوں نے کہا کہ جائیکا کو جو زمین دینا ہے وہ خالی کرائی جائے، فزیبلیٹی رپورٹ بنائی جائے تو لیاری ایکسپریس وے پر بھی وفاق مدد کرے گا۔

نواز شریف کا کہنا تھا کہ یہ تاثر غلط ہے کہ حکومت صرف لاہور کو بنانا چاہتی ہے، کراچی کو نظرانداز کرنے کے بارے میں سوچ بھی نہیں سکتے۔ سماء