مہمند ایجنسی میں خودکش دھماکا

غلنئی: مہمند ایجنسی کے ہیڈکواٹرز غلنئی کے مین گیٹ پر  خود کش دھماکے سے چار لیویز اہل کار شہید اور پانچ زخمی ہوگئے، جب کہ فورسز نے بروقت کارروائی کرتے ہوئے دوسرے خودکش بمبار کو گولی مار کر جہنم واصل کردیا۔

سیکیورٹی فورسز نے بروقت کارروائی کے دوران خودکش حملہ ناکام بنا دیا، پولیٹیکل انتظامیہ کے مطابق مہمند ایجنسی کے ہیڈکواٹرز غلنئی میں پولیٹیکل آفس کے مین گیٹ پر خودکش حملہ آور نے خود کو دھماکے سے اڑا لیا، جب کہ دوسرے خود کش حملہ آور کو سیکیورٹی فورسز نے فائرنگ کرکے ہلاک کردیا۔

لیویز اہل کاروں کے مطابق ایک حملہ آور نے خودکش حملے سے  پہلے پولیٹیکل آفس کے مین گیٹ پر ہینڈ گرینڈ سے حملہ بھی کیا۔ دھماکے سے چار لیویز اہل کار شہید ، جب کہ پانچ زخمی ہوئے۔ کارروائی میں دو حملہ آور ہلاک ہوئے۔ شہید اہلکاروں نے ہاﺅسنگ کالونی میں موجود لیویز کے بہت سے دیگر اہلکاروں کی جانیں بچانے کے لئے اپنی جانیں قربان کیں۔

پولیٹیکل انتظامیہ کے مطابق شہید اہلکاروں کے جسد خاکی اور زخمی اہل کاروں کو اسپتال منتقل کردیا گیا ہے، جب کہ دھماکے کے بعد فورسز نے علاقے کو گھیرے میں لے لیا۔ لیویز ذرائع کے مطابق حملہ آوروں کی افغانستان کے راستے پاکستان میں داخلے کی اطلاعات تھیں۔

دھماکے کے فوراً بعد علاقے کی ناکہ بندی کردی گئی اور بزدلانہ حملہ میں ملوث مجرموں کی گرفتاری کے لئے ایک بڑا آپریشن شروع کردیا گیا ہے۔ سماء