برطانیہ میں اے آر وائی کے3 چینلزکی نشریات بند،6لائسنس منسوخ

لندن : برطانیہ میں اے آر وائی کے تین چینلز کو بند کردیا گیا ہے، جب کہ چھ چینلز کے لائسنسز کو منسوخ کردیا گیا ہے، مقدمہ ہارنے پر اے آر وائی کو 30لاکھ پاؤنڈ ہرجانے اور خرچہ بھی ادا کیا جائے گا۔ برطانوی ادارے نے اے آر وائی کے خلاف یہ اقدام برطانوی ہائی کورٹ کے فیصلے کے بعد کیا۔ اے آر وائی کے خلاف متعلقہ فریق نے 24 دعوؤں میں اپنے آپ کو بے گناہ ثابت کیا۔ اے آر وائی برطانوی عدالت میں الزامات کا دفاع نہ کرسکا۔

برطانوی عدالت کی جانب سے فیصلے کے مطابق اے آر وائی مخالف فریق کو 26 کروڑ روپے (دو ملین پاؤنڈ) ادا کرے گا۔ اس رقم میں ہرجانہ، قانونی اخراجات، کامیابی کی فیس اور انشورنس پریمیئم شامل ہے، اس عدالتی فیصلے کے نتیجے میں اے آر وائی کو 30 لاکھ پاؤنڈ(یعنی 40کروڑ روپے) کا نقصان ہوگا جس میں اس کے قانونی اخراجات بھی شامل ہیں۔

برطانیہ میں اے آر وائی کے چیف آپریٹنگ آفیسر فیاض غفور نے برطانوی عدالت میں مخالفین کی قانونی ٹیم کے سوالات کا جواب دینے سے بچنے کے لیے عدالت کے کٹہرے میں کھڑے ہونے سے بھی انکار کر دیا تھا۔ ان تمام معاملات سے متعلق مقدمات تین برس سے پاکستان کی مختلف عدالتوں میں بھی زیر سماعت ہیں۔ سماء