ٹرمپ احکامات پر مسلم ممالک کے شہری گرفتار،امریکی ایئرپورٹ پر احتجاج

واشنگٹن: امریکی صدر ڈونلڈ ٹرمپ کے احکامات کے بعد امریکی ہوائی اڈوں پر سات مسلم ممالک کے شہریوں کی پکڑ دھکڑ شروع ہوگئی۔ نیویارک ایئرپورٹ پر دو عراقی شہریوں کو حراست میں لے لیا گیا۔

تفصیلات کے مطابق ٹرمپ کے حکم نامے کے بعد دوعراقی شہریوں کو جان ایف کینیڈی ایئرپورٹ پر گرفتار جبکہ متعدد کو قاہرہ کے ہوائی اڈے پرروک لیا گیا۔

مسلمانوں کوامریکا میں داخلے سے روکنے کیلئے ایگزیکٹو آرڈرجاری

امریکی انتظامیہ کے اقدامات کے خلاف نیویارک میں مظاہرہ کیا گیا جس میں ٹرمپ پالیسیوں کو شدید تنقید کا نشانہ بنایا گیا۔

ٹیکنالوجی کمپنی گوگل نے بھی ٹرمپ انتظامیہ کے اقدامات کے بعد اپنے اس تمام عملے کو واپس بلا لیا ہے جو بیرون ملک سفر پر ہیں۔ فیس بک کے بانی مارک زکربرگ نے اپنے ایک پیغام میں لکھا کہ وہ صدر کے اس حکم نامے پر کافی 'پریشان' ہیں کیونکہ وہ بھی کئی دوسرے امریکیوں کی طرح پناہ گزینوں ہی کی اولاد ہیں۔

اُدھر ڈونلڈ ٹرمپ نے ایک اور ایگزیکٹو آرڈر جاری کیا ہے جس میں امریکی فوج کو داعش کو شکست دینے کیلئے تیس دن میں پلان ترتیب دینے کی ہدایت کی گئی ہے۔

اس سے قبل امریکی صدر کا روسی اور فرانسیسی ہم منصب سے ٹیلی فون پر رابطہ ہوا جس میں دہشت گردی کیخلاف مشترکہ کوششوں پر اتفاق کیا گیا۔ سماء