نائٹ کلب میں فائرنگ،جاں بحق افراد کی تعداد 39ہوگئی

انقرہ :  ترکی میں نیو ایئر رات پر نائٹ کلب میں دہشت گرد کے حملے میں جاں بحق ہونے والوں کی تعداد 39 تک جا پہنچی ہے، جب کہ حملے میں چالیس سے زائد افراد زخمی بھی ہوئے۔ پولیس کے مطابق مرنے والوں میں 16 غیر ملکی بھی شامل ہیں۔ غیر ملکی خبر رساں ایجنسی کی جانب سے جاری اطلاعات کے مطابق استنبول کے نائٹ کلب میں سال نو کی تقریب پر حملے میں جاں بحق افراد کی تعداد39 تک جا پہنچی ہے،جب کہ حملے میں چالیس سے زائد افراد زخمی ہوئے ہیں۔ مرنے والوں میں 16 غیر ملکی بھی شامل ہیں۔

استنبول کے گورنر نے مرنے والوں کی تصدیق کرتے ہوئے کہا ہے کہ نائٹ کلب پر ہونے والے حملے میں کم از کم 39 افراد جاں بحق ہوئے ہیں۔ استنبول کے گورنر واصب شاہین کا کہنا تھا کہ حملے میں ایک پولیس اہلکار بھی ہلاک ہوا، یہ ایک 'دہشت گرد' حملہ تھا۔یہ حملہ مقامی وقت کے مطابق رات ڈیڑھ بجے ہوا جس میں کم از کم 40 افراد کے زخمی ہونے کی بھی اطلاعات ہیں۔

گورنر نے کہا کہ اس حملے کا ذمہ دار ایک شخص تھا، جب کہ سی این این ترک کا کہنا ہے کہ وہ شخص سانتا کلاز کے لباس میں ملبوس تھا۔رینا نائٹ کلب میں جائے وقوعہ پر موجود گورنر واصب شاہین نے صحافیوں کو بتایا کہ 'دور تک نشانہ لگانے والے اسلحے سے لیس ایک دہشت گرد نے ظالمانہ اور بے رحم فائرنگ سے معصوم لوگوں کو نشانہ بنایا، جو صرف سال نو کی خوشی اور تفریح کے لیے آئے تھے۔   اطلاعات کے مطابق حملے کے وقت نائٹ کلب میں 700 افراد موجود تھے اور کچھ افراد نے حملے کے وقت جان پچانے کے لیے آبنائے بوسفورس میں چھلانگ لگا دی۔ استبول میں سال نو کے موقع پر تقریبا 17 ہزار پولیس اہلکار ڈیوٹی پرتعینات تھے۔ سماء