زرداری کا طیارہ کراچی لینڈ کرگیا

کراچی : سابق صدر آصف علی زرداری کا دبئی سے آنے والا طیارہ ملکی حدود ہونے کے بعد کراچی کے اولڈ ایئرپورٹ پر لینڈ کرگیا ہے۔ پاکستان پیپلزپارٹی پارلیمنٹرینز کے سربراہ اور سابق صدر زرداری اٹھارہ ماہ کی خود ساختہ جلا وطنی کے بعد وطن واپس آ رہے ہیں، دبئی سے آنے والے جس طیارے میں سابق صدر سوار ہیں، وہ ملکی حدود میں داخل ہوگیا ہے۔ ذرائع کے مطابق وی وی آئی پی گاڑیاں اولڈ ٹرمینل نمبر 1 اور 2 پر پارک ہونگی، حکام کے مطابق شارع فیصل کو کسی بھی مقام پر بلاک نہیں کیا جائے گا، اس موقع پر پولیس کے 5711 اہل کار ڈیوٹی پر مامور کیے گئے ہیں۔ پولیس کی 3201 جب کہ ایس ایس یو کی 502 یونٹس سیکیورٹی پر تعینات کی گئی ہیں۔   مزید تفصیل کے مطابق اسپیشل برانچ اور دیگر یونٹس کے بھی ہزاروں اہل کاروں کو سیکیورٹی فرائض انجام دینے کیلئے تعینات کیا گیا ہے، پولیس کی 92 جب کہ ایس ایس یو کی 43 موبائلز بھی سیکیورٹی پلان کا حصہ ہیں۔   طیارے میں سوار سابق صدر کے ساتھ ان کے صاحبزادے بھی سوار ہیں، طیارے سے اپنے ٹوئٹر پر پیغام میں بلاول بھٹو زرداری کا کہنا ہے کہ "ایک زرداری ، سب پر بھاری، آج سے  آج سے رائیونڈ کی الٹی گنتی شروع ہوگئی ہے"۔

Aik #Zardari, Sab pay bari. Countdown for Riawind starts from today. #GoNawazGopic.twitter.com/FzdTDY8ZTa

— BilawalBhuttoZardari (@BBhuttoZardari) 23 December 2016

شريک چئيرمين پیپلزپارٹی کو خوش آمديد کہنے کے لیے جيالے بے تاب ہيں۔۔ کراچی میں سابق صدر آصف زرداری کے شاندار استقبال کيلئے تاریخی تيارياں کرلی گئی ہیں۔ جیالوں کے قائد اور مفاہمت کے بادشاہ آصف زرداری کی واپسی  اور استقبال بھی شاہانہ انداز میں کرنے کی تیاریوں کیلئے شہر بھر کی تمام شاہراہوں پر خیرمقدمی بینرزلگ گئے۔ ایئرپورٹ اولڈ ٹرمینل پر کنٹینرز پہنچادیئے گئے ہیں، ساؤنڈ سسٹم اور کرسیاں لگانے کا کام بھی شروع کر دیا گیا، جیالے رہنما کہتے ہیں کہ آصف زرداری کی واپسی سے مخالفین کی نیندیں حرام ہوجائیں گی۔

رہنماؤں کا دعویٰ ہے کہ صرف کراچی ہی نہیں، صوبے کے مختلف علاقوں سے قافلے قائد کے استقبال کو پہنچ رہے ہیں۔ جلسے کی سیکیورٹی کیلئے بھرپورانتظامات کیے گئے ہیں، جب کہ ٹریفک کی روانی بحال رکھنے کیلئے متبادل روٹس کا اعلان بھی کیا گیا ہے۔  اولڈ ٹرمینل پرجلسہ گاہ کے اطراف خفیہ کیمرے لگا دئیے گئے ہیں۔

دوسری جانب مولابخش چانڈیو کہتے ہیں کہ زرداری کے آنے سے حکمران پریشان ہیں۔ عوام کو پریشانی سے بچانے کیلئے ٹریفک پولیس نے متبادل روٹس کا اعلان بھی کر دیا ہے۔ ٹریفک پولیس کی جانب سے جاری کردہ پریس ریلیز کے مطابق کلفٹن اورڈیفنس کے رہائشی ہینو چورنگی اور کورنگی انڈسٹریل ایریا روڈ ، مرتضیٰ چونرگی سے لنک روڈ اور ملیر تھانہ سٹی سے ملیر ہالٹ، ماڈل کالونی سے ائر پورٹ کا راستہ استعمال کریں۔

یہاں یہ بات بھی قابل ذکر ہے کہ سابق صدر کی گرفتاری سے کچھ گھنٹے قبل ہی رینجرز شدت کے  ساتھ ایکشن میں آگئے، اور زرداری کے اہم دست راز کے تین مختلف دفاتر پر چھاپے مارے گئے ہیں، جہاں سے غیر قانونی اسلحہ بڑی تعداد میں برآمد کرکے قبضے میں لے لیا گیا ، جب کہ دفاتر میں موجود خفیہ ریکارڈ بھی رینجرز نے حاصل کرلیا۔ ذرائع کے مطابق دفتر میں رقوم کی منتقلی کا کاروبار ہوتا تھا ۔