جسٹس (ر) سعید الزماں صدیقی گورنر سندھ تعینات، نوٹیفکیشن جاری

کراچی : جسٹس (ر) سعید الزماں صدیقی کو گورنر سندھ تعینات کردیا گیا، صدر مملکت نے وزیراعظم کی سفارش پر نوٹیفکیشن جاری کردیا۔

ڈاکٹر عشرت العباد کا 13 سالہ دور ختم ہوگیا، جسٹس (ر) سعید الزماں صدیقی کو گورنر سندھ تعینات کردیا گیا، صدر مملکت ممنون حسین نے وزیراعظم نواز شریف کی سفارش پر ان کی تعیناتی کا نوٹیفکیشن جاری کردیا۔

ویڈیو دیکھیں : جسٹس سعیدالزماں نےگورنرسندھ بنائےجانےپراہم بات بتادی

جسٹس (ر) سعید الزماں صدیقی سندھ کے 30 ویں گورنر ہوں گے، وہ سپریم کورٹ کے چیف جسٹس کے عہدے پر بھی فائز رہے جبکہ سابق صدر پرویز مشرف کیخلاف انہوں نے مسلم لیگ ن کے ٹکٹ پر صدارتی انتخاب بھی لڑا تھا۔

مزید جانیے : عہدہ چھوڑنے کے لیے کوئی پیغام نہیں ملا، گورنر سندھ

گورنر سندھ کے عہدے سے فارغ کئے گئے ڈاکٹر عشرت العباد خان متحدہ قومی موومنٹ کے رہنماء تھے، انہیں سابق صدر پرویز مشرف نے 2003ء میں عہدے پر تعینات کیا تھا، عشرت العباد خان کو کسی بھی صوبے طویل ترین عرصے تک گورنر رہنے کا اعزاز حاصل ہے، ان کا دور 13سال سے زائد عرصے پر محیط ہے، اس دوران انہوں نے کئی حکومتیں بدلتے دیکھیں، تاہم ہر حکومت نے ان پر اعتماد کا اظہار کرتے ہوئے عہدے پر برقرار رکھا۔

تفصیلات جانیے : گورنر سندھ کی تبدیلی، صوبائی حکومت کا شکایتوں بھرا ردعمل

سابق گورنر سندھ ڈاکٹر عشرت العباد نے ایم کیو ایم بانی سے اختلافات کے باعث پارٹی سے رابطے ختم کردیئے تھے، سابق ناظم کراچی مصطفیٰ کمال کی پاک سرزمین پارٹی کے قیام کے پیچھے بھی ان کا ہاتھ ہونے کی افواہیں گرم رہیں تاہم گزشتہ دنوں  پی ایس پی سربراہ اور ڈاکٹر عشرت العباد خان کے درمیان شدید اختلاف کھل کر سامنے آئے۔ سماء