ماہ صیام کے سیکیورٹی پلان کیلئے9 طیاروں کی خدمات حاصل

مکہ المکرمہ : مکہ المکرمہ میں ماہ صیام کے سیکیورٹی پلان کے لیے 9 طیاروں کی خدمات حاصل کرلی گئی ہیں۔ غیر ملکی خبر رساں ایجنسی کے مطابق ماہ صیام سیکیورٹی پلان کے تحت ماہ مقدس کے دوران معتمرین کی سلامتی اور مسجد حرام میں امن امان میں معاونت کیلئے نو طیاروں اور جدید ترین مواصلاتی آلات سے لیس ہیلی کاپٹروں کی خدمات حاصل کی جائیں گی۔ ذرائع ابلاغ کے مطابق سعودی عرب کی جنرل ایوی ایشن اتھارٹی کے سربراہ میجر جنرل محمد بن عید الحربی نے بتایا کہ رمضان المبارک کے عمرہ سیکیورٹی پلان کے تحت جدید مواصلاتی آلات سے لیس نو طیارے مختص کیے گئے ہیں۔ انہوں نے بتایا کہ امن وامان کی صورت حال پر نظر رکھنے کے لیے طیاروں کی خدمات کا حصول پہلی بار نہیں کیا گیا بلکہ ماضی میں بھی ہوائی جہازوں اور ہیلی کاپٹروں کی خدمات لی جاتی رہی ہیں، دیگر شعبوں کی طرح جنرل ایوی ایشن اتھارٹی کے طیارے بیت اللہ کے دیدار کا شرف حاصل کرنے کے لیے آنے والے مہمانوں کی خدمت اور ان کے تحفظ پرمامور ہوں گے۔ طیارے بیت اللہ کے آس پاس، مکہ مکرمکہ کو جدہ اور مدینہ منور سے ملانے والی شاہرات اور رش والے مقامات کی فضائی نگرانی کریں گے، جدید مواصلاتی آلات سے لیس طیارے کیمروں کی مدد سے حاصل کردہ تصاویر کنٹرول رومز اور سیکیورٹی اداروں کو ارسال کریں گے جن کی روشنی میں انتظامیہ معتمرین کو درپیش مسائل کے حل کے لیے اقدامات کرے گی۔ سماء