پی ٹی اے کی انٹرنیٹ سروسز کی غیر قانونی طور پر فراہمی کیخلاف سخت اقدامات

پاکستان ٹیلی کمیونیکیشن اتھارٹی (پی ٹی اے) انٹرنیٹ سروسز کی غیر قانونی فراہمی کے خاتمے کے لیے اپنی پر عزم کوششیں جاری رکھے ہوئے ہے، اس سلسلے میں پی ٹی اے نے وفاقی تحقیقاتی ادارے کے ساتھ مل کر ضلع گھوٹکی اور لاہور کے علاقے جوہر ٹاؤن میں کامیاب چھاپے مارے ہیں۔

چھاپوں میں ڈھرکی، ضلع گھوٹکی میں ظفر بازار روڈ پر واقع ایک غیر قانونی انٹرنیٹ سروس فراہم کرنے والے پر چھاپہ مارا گیا ، جس کے دوران غیر قانونی آئی ایس پی کا سامان ضبط کر لیا گیا، جبکہ لاہور میں آپریشنل انٹرنیٹ سیٹ اپ پایا گیا جو بغیر کسی جائز لائسنس کے چلایا جا رہا تھا، دو افراد کو حراست میں لے لیا گیا اور متعلقہ آلات (سوئچ ، راؤٹرز وغیرہ) ضبط کر لیے گئے، دفتر کو سیل کر دیا گیا ہے اور قانون کے مطابق مزید انکوائری کی جا رہی ہے۔

ترجمان پی ٹی اے کے مطابق انٹرنیٹ کی غیر قانونی طور پر سروسز کی روک تھام کے حوالے سے کامیاب کوششیں پی ٹی اے کے عزم، مسلسل نگرانی اور غیر قانونی انٹرنیٹ سروسز کو روکنے کے حوالے سے جاری مسلسل کوششوں کو ظاہر کرتی ہیں، یہ اقدامات ٹیکس چوری اور ریونیو کی غلط رپورٹنگ کی روک تھام اور قومی خزانے کو پہنچنے والے نقصانات کی تلافی میں اہم کردار ادا کرتے ہیں۔

پی ٹی اے کی عوام سے اپیل ہے کہ وہ صرف پی ٹی اے کے لائسنس یافتہ آپریٹروں سے ٹیلی کام خدمات کے حصول کو ممکن بنائیں، تاکہ سروس کے اچانک معطل ہو جانے کی شکایت سے بچا جا سکے۔