پاکستان تحریک انصاف حقیقی کا قیام

یوم تکریم شہداء پر پاکستان تحریک انصاف حقیقی قائم کردی گئی، چیئرمین راؤ یاسر کا کہنا ہے کہ عمران خان کیخلاف غلط فیصلوں نے ملک کو نازک موڑ پر لاکھڑا کیا، پی ٹی آئی کےاندرسےکرپشن ہوئی۔

ملتان میں پریس کانفرنس کرتے ہوئے راؤ یاسر اور دیگر رہنماؤں نے پاکستان تحریک انصاف حقیقی کے قیام کا اعلان کردیا۔

راؤ یاسر نے کہا کہ ہماری پریس کانفرنس کا مقصد ہے ہمارا پیارا پاکستان، عمران خان کے غلط فیصلوں نے ملک کو نازک حالات میں لاکھڑا کیا ہے، عمران خان کو شروع سے غلط سمت بتائی گئی، ہمارا مقصد پاکستان اور پاک فوج ہے جو سرحدوں کی محفاظ ہے۔

ان کا کہنا ہے کہ حساس اداروں نے عمران خان کو بتایا کہ بشری بی بی اور بزدار کرپشن کررہے ہیں، پی ٹی آئی کے اندر سے کرپشن ہوئی، جس پر عمران خان نے کان نہ دھرے۔

چیئرمین پی ٹی آئی حقیقی نے کہا کہ نوجوانوں کو اس نہج پر پہنچایا گیا کہ وہ حساس اداروں کی تنصیبات پر حملہ آور ہوئے، 9 مئی کے واقعات کی مذمت کرتا ہوں، ملوث افراد کو قرار واقعی سزا ملنی چاہئے، جو لوگ بے گناہ ہیں ان کیلئے تحریک چلاؤں گا۔

راؤ یاسر نے کہا کہ یوم تکریم شہداء پر پی ٹی آئی حقیقی کے قیام کا اعلان کرتا ہوں، ملک بھر سے نوجوانوں کو اکٹھا کروں گا، جب بھی الیکشن ہوں گے تو نوجوان قیادت پارلیمںٹ جائے گی، دو سے 4 دن میں اپنی جماعت کو رجسٹرڈ کروا کر انتخابی نشان حاصل کروں گا۔