ایشیا کپ، بھارت نے پاکستانی تجویز پر مشروط رضا مندی ظاہر کر دی

بھارت نے ایشیا کپ کے لیے پاکستان کرکٹ بورڈ (پی سی بی) کے ہائبرڈ ماڈل پر مشروط رضامندی ظاہرکردی ۔

تفصیلات کے مطابق ایشیا کپ میں شرکت اور ون ڈے ورلڈکپ کی تیاریورں کے حوالے سے بی سی سی آئی کا اجلاس 27 مئی کو ہو گا جس میں تمام فیصلے کیے جائیں گے۔

اُدھر ہائبرڈ ماڈل کے تحت بھارت اپنے میچز نیوٹرل مقامات پر کھیلنے کے لیے تیار ہو گیا ہے جبکہ پاکستان اپنے ہوم گراؤنڈز پر اپنے میچز کھیلے گا۔

تاہم بھارتی کرکٹ بورڈ (بی سی سی آئی) نے بھارت میں ہونے والے انٹرنیشنل کرکٹ کونسل (آئی سی سی) ون ڈے ورلڈ کپ میں شرکت کے لیے پاکستان کرکٹ بورڈ سے تحریری یقین دہانی مانگی ہے۔

بھارتی میڈیا انڈین ایکسپریس کے مطابق سب کچھ منصوبہ بندی کے مطابق ہوتا ہے تو تجویز کو 27 مئی کو احمد آباد میں بی سی سی آئی کی خصوصی جنرل میٹنگ میں قبول کیا جائے گا۔

دیگرچارممالک بنگلا دیش، افغانستان، نیپال اور سری لنکا پہلے ہی تجویز کیلئے گرین سگنل دے چکے ہیں اور اب بھارتی کرکٹ بورڈ کے پاس اس ماڈل کی مخالفت کرنے کا کوئی جواز نہیں ہے۔

پاکستان نے ہائبرڈ ماڈل میں دو آپشنز پیش کیے ہیں۔ پہلے تجویز دی گئی تھی بھارت میچز نیوٹرل مقام پر کھیلے گا جبکہ ٹورنامنٹ کے بقیہ میچز پاکستان میں ہوں گے۔

دوسرا آپشن ہے کہ 50 اوورز کا ٹورنامنٹ دو مرحلوں میں کھیلا جائے گا جس کے تحت پہلے مرحلے میں بھارت کے علاوہ تمام ٹیموں کو پاکستان میں کم از کم ایک میچ کھیلنا ہوگا۔

دوسرے مرحلے میں ٹورنامنٹ کا بقیہ حصہ متحدہ عرب امارات (یو اے ای) میں کھیلا جانا ہے جس میں ہندوستان وہاں شرکت کرے گا۔

پاکستان کرکٹ بورڈ نے دبئی کو ہائبرڈ ماڈل میں ترجیحی نیوٹرل مقام قرار دیا ہے۔ دبئی ایشیا کپ کے دوسرے مرحلے کی میزبانی کرتا ہے تو بورڈ کو ’گیٹ منی‘ میں بھی اپنا حصہ ملے گا۔

تاہم اگر نیوٹرل وینیو یو اے ای کے علاوہ ہوتا ہے تو پی سی بی کو نقصان برداشت کرنا پڑے گا۔

اب صورتحال یہ ہے بہت سی ٹیمیں شدید گرمی کی وجہ سے متحدہ عرب امارات میں کھیلنے کی مخالفت کررہی ہیں اس لیے سری لنکا بقیہ میچوں کی میزبانی کر سکتا ہے۔ ایونٹ کا فائنل بھی نیوٹرل مقام پر کھیلا جائے گا۔