فوجی تنصیبات پر حالیہ حملے ناقابلِ برداشت ہیں، آرمی چیف

آرمی چیف جنرل سیّد عاصم منیر نے کہا ہے کہ افواجِ پاکستان کا ہرسپاہی سیاسی تعصبات سے بالاترہو کر صرف اپنے فرائض کو مقدم رکھتا ہے۔

ان خیالات کا اظہار سپہ سالار نے شہداء اور غازیوں کے اعزاز میں جی ایچ کیو میں تقریب تقسیم اعزازات کے موقع پر کیا۔

پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق شہداء اورغازیوں کے اعزازمیں جی ایچ کیومیں تقریبِ تقسیم اعزازات منعقد ہوئی، اس دوران سپہ سالار نے پاک فوج کے افسران وجوانوں کواعزازات سے نوازا۔ تقریب میں بڑی تعداد میں پاک فوج کے سینئر افسران اورشہداء کے اہلخانہ نے شرکت کی۔

بیان کے مطابق 51 افسران کو ستارہ امتیاز(ملٹری) ،22 افسران کو تمغہ بسالت اور2 جوانوں کو اقوامِ متحدہ کے خصوصی میڈل کے اعزاز سے نوازا گیا۔

اس موقع پر جنرل عاصم منیر نے 25 مئی کو “یومِ تکریمِ شہداءِ پاکستان “ منانے کا اعلان کر دیا۔

اس موقع پرآرمی چیف نے کہا کہ بلاشبہ شہداء کی فرض شناسی اورعظیم قربانیوں کے طفیل ہم ایک آزاد فضا میں زندگی بسرکر رہے ہیں، شہداء کی قربانیاں اورغازیوں کی خدمات ہمارا قیمتی اثاثہ اورسرمایہِ افتخارہیں۔

جنرل عاصم منیر نے کہا کہ پاک فوج بطور ادارہ اپنے سے منسلک ہر فرد اور اسکے لواحقین کو ہمیشہ یاد رکھتا ہے اور ہمارا یہ رشتہ بطور خاندان قابلِ فخر اور فقید المثال ہے۔ افواجِ پاکستان کا ہر سپاہی اور آفسر تمام علاقائی، لسانی، اور سیاسی تعصبات اور امتیازات سے بالاتر ہو کر صرف اور صرف اپنے فرائض اور ذمہ داریوں کو مقدم رکھتا ہے۔ مضبوط فوج مملکت کی سلامتی اور اتحاد کی ضامن ہوتی ہے۔

انہوں نے حالیہ دنوں میں فوجی تنصیبات، یادگاروں اور شہداء کی حرمتوں پر حملوں کو انتہائی افسوس ناک قرار دیتے ہوئے کہا کہ یہ ناقابلِ برداشت ہیں ۔