ملک میں سونے کی قیمت میں ہزاروں روپے کا اضافہ

ملک بھر میں سونے کی قیمت غریبوں کی پہنچ سے دور ہونے لگی ایک مرتبہ پھر ہزاروں روپے کا بڑا اضافہ دیکھا گیا۔

تفصیلات کے مطابق بین الاقوامی مارکیٹ میں فی اونس سونے کی قیمت میں 5 امریکی ڈالر کی گراوٹ دیکھی گئی اور نئی قیمت 1972 امریکی ڈالر ہو گئی ہے۔

عالمی مارکیٹ میں قیمتیں کم ہونے کے بعد ملکی صرافہ مارکیٹوں لاہور، کراچی، اسلام آباد، پشاور، کوئٹہ، حیدر آباد، سکھر، گوجرانوالا، فیصل آباد ، راولپنڈی سمیت دیگر جگہوں پر فی تولہ سونے کی قیمت میں دو ہزار روپے کا اضافہ دیکھا گیا اور نئی قیمت 237300 روپے ہو گئی ہے۔

اُدھر دس گرام سونے کی قیمت میں بھی 1714 روپے کی بڑھوتری دیکھی گئی اور نئی قیمت 203446 روپے ہو گئی ہے۔

مزید برآں فی تولہ اور دس گرام چاندی کی قیمتیں 50 روپے اور 42.87 روپے اضافے کے بعد بالترتیب 2900 روپے اور 2486.28 روپے ہو گئی ہے۔