نیوزی لینڈ کی پاکستان کو ون ڈے سیریز کھیلنے کی پیشکش
نیوزی لینڈ کرکٹ بورڈ نے پاکستان کو وائٹ بال کرکٹ سیریز کھیلنے کی پیشکش کر دی۔
ذرائع کے مطابق دونوں بورڈز کے درمیان سیریز کے لیے مثبت بات چیت جاری ہے۔ چیئرمین مینجمنٹ کمیٹی برائے پی سی بی نجم سیٹھی براہ راست سیریز کے حوالے سے معاملات پر نیوزی لینڈ کرکٹ حکام سے بات کرنے میں مصروف ہیں۔
ذرائع کے مطابق نیوزی لینڈ کرکٹ بورڈ نے آسٹریلیا کے دورہ کے اختتام پر نیوزی لینڈ میں سیریز کھیلنے کی پیشکش کی ہے۔
خیال رہے کہ پاکستان کا آسٹریلیا تیسرا ٹیسٹ 7 جنوری کو سڈنی میں ختم ہو گا۔ نیوزی لینڈ کے پاس ساؤتھ افریقہ کی میزبانی سے قبل ایک ونڈو ہے۔
ذرائع کے مطابق جنوری کے دوسرے ہفتے کی ونڈو میں نیوزی لینڈٹیم وائٹ بال سیریز کے لیے پاکستان کی میزبانی کا خواہش مند ہے۔ سیریز میں 3 ون ڈے یا 5 ٹی ٹونٹی میچز پر بات چیت جاری ہے۔
ذرائع کے مطابق ممکنہ طور پر ٹی ٹونٹی ورلڈ کپ کی تیاری کے سلسلے میں ٹی ٹونٹی سیریز کھیلی جا سکتی ہے۔ نیوزی لینڈ کرکٹ کے دعوت نامے کے بعد پی سی بی اسٹیک ہولڈرز سے مشاورت کر رہا ہے، اگلے چند روز میں سیریز کو حتمی شکل دئیے جانے کا امکان ہے۔
