پاک بھارت ٹیسٹ سیریز کس ملک میں ہوگی، نجم سیٹھی نے اہم بیان دیدیا

پاکستان کرکٹ بورڈ کی مینجمنٹ کمیٹی کے سربراہ نجم سیٹھی نے پاکستان اور بھارت کے درمیان نیوٹرل مقام پر ٹیسٹ سیریز کرانے کیلئے گرین سگنل دیدیا۔ ان کا کہنا ہے کہ بھارت کیخلاف آسٹریلیا میں ریڈ بال سیریز کھیلنے کیلئے تیار ہیں۔

غیر ملکی میڈیا کو انٹرویو دیتے ہوئے پی سی بی مینجمنٹ کمیٹی کے سربراہ نجم سیٹھی نے پاکستان اور بھارت کے درمیان ٹیسٹ سیریز سے متعلق کھل کر بات کی۔

پی سی بی نے بھارت کے ساتھ نیوٹرل وینیو پر ٹیسٹ سیریز کیلئے گرین سگنل دے دیا۔ نجم سیٹھی نے کہا کہ بھارت کے ساتھ آسٹریلیا میں ٹیسٹ سیریز کھیلنے کیلئے تیار ہیں، بھارت کیخلاف ٹیسٹ سیریز کیلئے آسٹریلیا نیوٹرل وینیو ہوسکتا ہے۔

ان کا کہنا ہے کہ پاک بھارت ٹیسٹ سیریز آسٹریلیا کے علاوہ انگلینڈ اور جنوبی افریقا میں بھی ہوسکتی ہے، ہمارے لئے پہلا آپشن انگلینڈ جبکہ دوسرا آسٹریلیا ہوگا، اگر آسٹریلیا میں ہاؤس فل ہوسکتا ہے تو یہ بڑا اچھا ہوگا۔

نجم سیٹھی نے کہا کہ بھارت کے ساتھ ٹیسٹ سیریز کیلئے دبئی ہمارے لئے سستا پڑے گا، آسٹریلیا کو بھی ہم نے نیوٹرل وینیو کے طور پر نظر میں رکھا ہے۔

چیئرمین پی سی بی مینجمنٹ کمیٹی کا مزید کہنا ہے کہ ایشیا کپ کیلئے بھارت کو ہائبرڈ ماڈل دے چکے ہیں، انٹرنیشنل کرکٹ کونسل کو بھارت کے ساتھ بات چیت کرنی چاہئے، آئی سی سی کو بھارت سے کہنا چاہئے کہ جاؤ پاکستان میں جاکر کھیلو نہیں تو ہائبرڈ ماڈل اپناؤ، ورلڈ کپ اور چیمپئنز ٹرافی بچانے کیلئے آئی سی سی کو آگے آنا ہوگا۔

واضح رہے کہ بھارت کے ساتھ ٹیسٹ سیریز کا آئیڈیا گزشتہ سال بھی خبروں کی زینت بنا تھا، بھارت اور پاکستان کے درمیان سیاسی تناؤ کی وجہ سے دوطرفہ سیریز نہیں ہورہی، بھارت اور پاکستان کے درمیان آخری بار باہمی سیریز 2013ء میں کھیلی گئی تھی، دونوں ٹیموں کے درمیان آخری بار ٹیسٹ میچ دسمبر 2007ء میں کھیلا گیا تھا۔

میلبرن اور سڈنی میں پاکستانی و بھارتی کمیونٹی کی بڑی تعداد بستی ہے، گزشتہ سال میلبرن میں پاک بھارت میچ 90 ہزار شائقین نے دیکھا، آسٹریلیا میں ٹیسٹ سیریز ہونے سے شائقین کرکٹ کی بڑی تعداد کھیل کا لطف اٹھاسکے گی۔