ججز سے اظہار یکجہتی کے لیے عوام گھروں سے نکلیں، عمران خان کی اپیل

پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ ہفتے کے دن مغرب سے ایک گھنٹہ پہلے اپنے اپنے گاؤں اور محلوں میں جمع ہو کر چیف جسٹس آف پاکستان جسٹس عمر عطاء بندیال اور سپریم کورٹ سے یکجہتی کا اظہار کریں۔

ان خیالات کا اظہار انہوں نے اپنے ویڈیو بیان میں کیا، یہ ویڈیو بیان پاکستان تحریک انصاف کے سینئر رہنما فواد چودھری کی طرف سے سماجی رابطے کی ویب سائٹ ٹویٹر پر شیئر کیا گیا۔

سابق وزیراعظم نے کہا کہ ملک اس وقت فیصلہ کن موڑ پر کھڑا ہے،ملک پر مافیا نے قبضہ کیا ہوا ہے، کیونکہ ملک میں تاریخی مہنگائی اور بیروزگاری ہو رہی ہے، مخالفین الیکشن ہارنے سے ڈر رہے ہیں۔

اپنی بات کو جاری رکھتے ہوئے پی ٹی آئی چیئر مین کا کہنا تھا کہ مخالفین الیکشن کی شکست سے ڈر رہے ہیں اسی لیے یہ لوگ پاکستان کا آئین تباہ کرنے پر تلے ہیں، پی ڈی ایم والے سپریم کورٹ کو بھی تباہ کرنے لگے ہوئے ہیں، مخالفین چیف جسٹس اور سپریم کورٹ کے ججز کیخلاف کمپین چلا کر پروپیگنڈہ کر رہے ہیں۔

عمران خان نے کہا کہ میں عوام سے کہتا ہوں ہفتے والے دن مغرب سے ایک گھنٹہ قبل گھروں سے باہر نکلیں، گلی، محلے، گاؤں میں جا کر آئین اور اپنے بچوں کے مستقبل کو بچانے کے لیے احتجاج کریں۔

انہوں نے کہا کہ چیف جسٹس آف پاکستان اور سپریم کورٹ سے اظہار یکجہتی کا اظہار کریں۔