سپریم کورٹ کے ججز ذاتی لڑائی کو چھوڑ کر متحد ہو جائیں، عمران خان

پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ اس وقت صرف سپریم کورٹ آف پاکستان ہی ہماری مدد کر سکتی ہے، عدالت عظمیٰ کے ججز اپنی ذاتی لڑائی کو چھوڑ کو ایک ہو جائیں۔ ہینڈلرز حکومت کے پیچھے کھڑے ہو گئے ہیں، الیکشن سے بھاگنے کے لیے لڑائیاں کروا رہے ہیں۔

کارکنوں سے ویڈیو لنک کے ذریعے خطاب کرتے ہوئے سابق وزیراعظم نے کہا کہ رات کو بارہ بجے عدالت کھلنے پر تکلیف ہوئی، رات کوعدالت کھلنے کے علاوہ میں نے کبھی عدالتوں پر تنقید نہیں کی، ہمیشہ عدالتوں کے فیصلوں کا احترام کیا، جس قوم میں انصاف نہیں ہوتا وہ آزاد نہیں ہوتی، یہ پہلے مجھے کہتے تھے اگر الیکشن چاہئیں تو اپنی اسمبلیوں کو تحلیل کردیں، اب کر دی ہیں۔ جب ہم نےاسمبلیاں تحلیل کیں تو اب یہ بہانے لگا رہےہیں، قانونی ماہرین نے کہا اسمبلیوں کی تحلیل کے بعد 90 دن کے اندرالیکشن ہونگے۔

یہ بھی پڑھیں، حکومت فوری اسمبلی توڑ کر الیکشن کرانا چاہتی ہے تو ہی بات کریں،عمران خان

اپنی بات کو جاری رکھتے ہوئے پی ٹی آئی کے چیئر مین کا کہنا تھا کہ مخالفین بھول جاتے ہیں سوشل میڈیا کا دور ہے، سوشل میڈیا میں آدھے گھنٹے میں جھوٹ پکڑا جاتا ہے، نوازشریف، شاہدخاقان عباسی پہلے کہتے تھے ایک دن الیکشن میں تاخیر نہیں ہو سکتی، یہ لوگ پہلے کہتے تھے اگر الیکشن نہیں ہونگے تو آرٹیکل 6 لگے گا، اب نوے دن ہو گئے اور الیکشن نہیں ہو رہا، بارہ جماعتیں اسمبلی میں کہہ رہی ہیں کہ انتخابات نہیں ہونگے۔

انہوں نے مزید کہا کہ افسوس ہینڈلرزان کے پیچھے کھڑے ہو گئے ہیں، الیکشن سے بھاگنے کے لیے لڑائیاں کروا رہے ہیں، سپریم کورٹ کے 15 ججز سے اپیل کرتا ہوں، خدا کے واسطے متحد ہو جائیں، پاکستان تباہی کے کنارے کھڑا ہے، اگر انہوں نے پاکستان کے آئین کو ختم کیا تو جنگل کا قانون ہو گا۔

یہ بھی پڑھیں، احتساب کے خوف سے مخالفین قتل کی کوششوں میں مصروف ہیں، عمران خان

عمران خان کا کہنا تھا کہ پرویزالہیٰ کے گھر کا بکتر بند گاڑی سے دروازہ توڑا گیا، کسی مہذب معاشرے میں ایسا نہیں ہو سکتا، زمان پارک میں میرے گھر کے دروازے کو توڑا اور ملازمین پر تشدد کیا گیا، آج پاکستان میں جنگل کا قانون ہے ، یہ جو مرضی کر رہے ہیں، ظل شاہ کے جسم پر 26 جگہوں پرتشدد کے نشان تھے، ظل شاہ معصوم انسان تھا، بے شرموں کو کوئی غیرت نہیں آئی، اس کو مار کر کیس میرے اوپرڈال دیا۔

سابق وزیراعظم کا کہنا تھا کہ علی امین گنڈا پور کے خلاف پورے ملک میں کیسز بنائے جا رہے ہیں، اعظم سواتی کو بچوں کے سامنے تشدد کا نشانہ بنایا گیا، میرے خلاف کیسز کی تعداد 145 ہو چکی ہے، میرے خلاف غداری کے کیسز بنائے گئے۔

پی ٹی آئی چیئر مین کا کہنا تھا کہ سپریم کورٹ کے 15 ججز سے کہتا ہوں قوم آپ کی طرف دیکھ رہی ہے، آپ آئین کیساتھ کھڑے ہو، نوے دن گزر گئے، نگراں حکومتیں اب غیر قانونی ہیں، نگراں حکومتوں کا کام الیکشن کروانا تھا ، نگراں حکومتوں نے الیکشن کے حوالے سےایک کام نہیں کیا، ابھی تک نگراں حکومتیں کیوں بیٹھیں ہیں کون ان کے پیچھے ہے؟ صرف سپریم کورٹ سے انصاف کی امید ہے، سپریم کورٹ سےقوم کی طرف سےکہتا ہوں ذاتی لڑائیوں کو تھوڑی دیر پیچھے کر دیں۔

یہ بھی پڑھیں ،الیکشن التواء کی غیرآئینی کوششوں کی بھرپور مزاحمت کرینگے، عمران خان

انہوں نے کہا کہ جب سے چور اقتدار میں آئے ادارے تباہ کر دیئے، نو لاکھ پاکستانی ملک چھوڑ کر جا چکے ہیں، پرویزالہیٰ کے گھرچادراورچاردیواری کےتقدس کو پامال کیاگیا، عوام کو غصہ ہے اگر الیکشن کی امید لے لی تو سری لنکا سے برا حال ہو گا، اگرعوام کی امید ختم ہوگئی تو سنبھالےنہیں جائیں گے، میں ڈرا نہیں رہا سمجھا رہا ہوں۔

عمران خان کا مزید کہنا تھا کہ میں اپنی ساری قوم کو پیغام دے رہا ہوں، یکم مئی بروز سوموار، لیبرڈے ہے، اسلام آباد، پشاور اور لاہور میں ہم اپنے مزدوروں کیلئے دوپہر 1بجے ریلی نکالیں گے، لاہور ریلی کی قیادت میں خود کرونگا، ریلی کا دوسرا مقصد ہے آئین بچاؤ، پاکستان بچاؤ! شاہ محمود قریشی اسلام آباد اور پرویز خٹک پشاور میں ریلی کی قیادت کریں گے۔

ان کا کہنا تھا کہ 14مئی سے پہلے اسمبلی تحلیل کردی تو ہم پورے پاکستان میں الیکشن کیلئے تیار ہیں، بجٹ کے بعد اسمبلی تحلیل کرنے کی بات میں مجھے بدنیتی نظر آتی ہے۔