واٹس ایپ اپنے صارفین کیلئے انتہائی دلچسپ اور اہم فیچر لارہا ہے

واٹس ایپ طویل عرصے سے ایک مخصوص فیچر پر کام کررہا ہے، جس کے ذریعے اب صارفین پیغامات (امیجز، ویڈیوز اور جیفز) کو ایڈٹ کرسکیں گے۔

واٹس ایپ سے متعلق معلومات نشر کرنیوالی ویب سائٹ ’ڈبلیو اے بیٹا انفو‘ کے مطابق اینڈرائیڈ فونز استعمال کرنیوالوں کیلئے نیا فیچر لانچ کردیا گیا، جس کے ذریعے صارفین امیجز، ویڈیوز اور جیفز کو ایڈٹ کرسکیں گے۔

رپورٹ کے مطابق آئی او ایس (آئی فون) والوں کیلئے واٹس ایپ بیٹا پر نئے فیچر کیلئے کام ہو رہا ہے۔ اینڈرائیڈ فونز پر واٹس ایپ بیٹا کا نیا ورژن پلے اسٹور کے ذریعے ڈاؤن لوڈ کیا جا سکتا ہے۔

ویب سائٹ کے مطابق اپنے واٹس ایپ پر ٹیکسٹ ایڈیٹر کھول کر دیکھیں جس سے معلوم ہوجائے گا کہ نیا فیچر آپ کے اکاؤنٹ پر میسر ہے یا نہیں۔

اب صارفین کیلئے نئے فیچرز کے تحت مختلف فونٹس استعمال کرنا آسان ہوگیا، اگرچہ پہلے بھی آسان تھا لیکن اب وہ زیادہ تیزی سے دوسرے فونٹس کا انتخاب کرسکیں گے۔

نئے فیچر کے تحت ٹیکسٹ کو دائیں، بائیں اور درمیان میں ترتیب کیا جاسکے گا، اس طرح سے صارفین کو زیادہ آزادی حاصل ہوگی کہ وہ اپنے امیجز، ویڈیوز اور جیفز پر ٹیکسٹ مرضی کے مطابق ایڈجسٹ کرسکتے ہیں۔

واٹس ایپ کے نئے فیچر کا استعمال کرتے ہوئے بیک گراؤنڈ کا رنگ بھی تبدیل کیا جا سکے گا، جس سے ٹیکسٹ اور بیک گراؤنڈ کے رنگ میں فرق واضح ہوگا۔

واٹس ایپ کے بیٹا ورژن اور واٹس ایپ بزنس کے صارفین کو نئے فیچرز سے لیس ٹیکسٹ ایڈیٹر تک رسائی دی گئی ہے، لیکن اگر کسی صارف کے واٹس ایپ پر یہ فیچرز میسر نہیں تو وہ پریشان نہ ہوں، آئندہ ہفتوں میں مزید صارفین اسے استعمال کر سکیں گے۔

دوسری جانب ڈبلیو اے بیٹا انفو کا اپنے ٹوئٹر پیغام میں یہ بھی کہنا ہے کہ مارک زکربر اور ول کیچ کارٹ نے تصدیق کی ہے کہ واٹس ایپ پر تین نئے فیچرز آرہے ہیں۔