لاہور میں کارروائی، 5 کروڑ روپے سے زائد مالیت کی چوری کی گاڑیاں برآمد

اینٹی وہیکل لفٹنگ اسٹاف نے لاہور میں متحرک گاڑی و موٹر سائیکل چوری میں ملوث 16 رکنی گروہ کو گرفتار کرلیا، ملزمان سے 5 کروڑ روپے سے زائد مالیت کی گاڑیاں اور موٹر سائیکلیں برآمد کرلیں۔

اینٹی وہیکل لفٹنگ اسٹاف حکام کے مطابق ملزمان پوش علاقوں میں ریکی کرکے گاڑی اور موٹر سائیکل چوری کرتے، واردات کیلئے ماسٹر کیز کا استعمال کیا جاتا، کار چور گروہ واردات کے بعد چوری کی گئی گاڑیاں خیبرپختونخوا لیجاکر اونے پونے داموں فروخت کردیتے تھے۔

حکام کا کہنا ہے کہ ملزمان کے قبضے سے 5 کروڑ 21 لاکھ روپے مالیت کی 19 گاڑیاں اور 172 موٹر سائیکلیں برآمد کرلی گئی ہیں، گرفتار ملزمان سے مزید تفتیش جاری ہے۔